У Бабруйскім судзе 10 жніўня вынеслі прысуд па крымінальнай справе супраць пяці мясцовых жыхароў, трое з якіх унесены ў «тэрарыстычны» спіс КДБ. Ім прысудзілі ад двух гадоў «хатняй хіміі» да 16 гадоў калоніі ўзмоцненага рэжыму, паведамляюць праваабаронцы.
Па справе праходзяць Ігар Казлоў, Канстанцін Ермаловіч, Віталь Мінкевіч, Наталля Кед і Надзея Полькіна.
Паведамляецца, што Казлова, Ермаловіча і Мінкевіча абвінавацілі ў дзеяннях «тэрарыстычнага характару» летам і восенню 2021 года, а мінавіта ў мінаванні чыгункі. Таксама сілавікі палічылі «тэрактам» падпал стралковага ціру, што належыць вайсковай частцы 5527 у Бабруйску. Іх асудзілі паводле наступных артыкулаў:
- стварэнне арганізацыі для ажыццяўлення тэрарыстычнай дзейнасці або ўдзел у ёй (ч. 2 арт. 290.4 КК);
- акт тэрарызму (ч. 2 арт. 289 КК);
- пагроза здзяйснення акту тэрарызму; (ч. 2 арт. 290 КК);
Таксама жыхароў Бабруйску, у тым ліку Наталлю Кед і Надзею Полькіну, прызналі вінаватымі ў спальванні на Масленіцу ў 2021 годзе пудзіла, падобнага да Лукашэнкі. Гэта палічылі абразай Лукашэнкі па ч. 1 арт. 368 КК.
Суддзя Наталля Агладкова вынесла бабруйцам наступныя прысуды:
- Кастусь Ермаловіч атрымаў 16 гадоў калоніі ўзмоцненага рэжыму і штраф 9600 рублёў;
- Віталь Мінкевіч – 15 гадоў калоніі ўзмоцненага рэжыму;
- Ігар Казлоў – 14 гадоў калоніі ўзмоцненага рэжыму;
- Надзея Полькіна – 2 гады калоніі агульнага рэжыму:
- Наталля Кед – 2 гады «хатняй хіміі».
Для ўсіх абвінавачаных мужчын пракурор запытваў тэрмін на год больш, жанчынам прысудзілі такія ж тэрміны, як і запытваў бок абвінавачвання.
Алена Рувіна belsat.eu
