На прадпрыемстве «Белмедпрэпараты» прызналі, што ім не стае дэталяў, неабходных для пакавання лекаў. Як стала вядома «Белсату», усе кроплі для вачэй, што выпускаюць на заводзе, цяпер прадаюцца без адмысловых вечак-кропельніц.
У прыватнасці, ва ўсечанай камплектацыі цяпер выпускаюць кроплі «Эмаксіпін». Раней яны былі з адмысловым прыстасаваннем на флаконе, цяпер замест яго – паперка з інфармацыяй пра тое, што «дазваляецца часовая рэалізацыя кропляў для вачэй без вечка-кропельніцы».
На «Белмедпрэпаратах» прызналіся, што цяпер усе кроплі для вачэй іхнай вытворчасці пастаўляюцца без неабходных вечак:
«Гэта з усімі кроплямі для вачэй. Мы працуем над зменамі, імаверна, зменім дызайн».
Ці вернуцца некалі кропельніцы, на заводзе не ведаюць:
«Не падкажу, калі менавіта яны з’явяцца. На жаль, мы толькі можам рэкамендаваць набываць піпеткі для закапвання ў вочы».
На пытанне, чаму зніклі гэтыя дэталі, у кампаніі адказваюць ухіліста: «Гэта выдаткі вытворчасці».
Раней суполка «Белыя халаты» паведамляла, што беларускія фармацэўтычныя кампаніі сутыкнуліся з дэфіцытам тары для лекаў. Вытворцам бракуе шкляных бутэлечак для раствораў і туб для мазяў, якія вазілі з краінаў ЕЗ. Праз гэта, як сцвярджалі «Белыя халаты», на «Белмедпрэпаратах» нават спынялі разліў вакцыны «Спутник».
Сяргей Крот belsat.eu