Навігацыйныя пломбы паўгода таму абавязалі ставіць на фуры з Літвы, цяпер – яшчэ і з Польшчы. Цана пломбы вырасла з таго часу з 3 да 10 базавых велічыняў.
Савет міністраў Беларусі 6 снежня прыняў змены ў пастанову «Аб ужыванні навігацыйных прыладаў (пломбаў)». Дакумент апублікавалі 8 снежня, ён набыў моц.
Навігацыйная пломба – прылада, якая дазваляе ў рэальным часе адсочваць перасоўванні грузу праз спадарожнік, яе абслугоўваюць мытнікі або «Белнафтагаз».
Цяпер ставіць навігацыйныя пломбы трэба не толькі на тавары, якія ўвозяцца аўтамабільным транспартам з Літвы, але яшчэ і з Польшчы. Выключэнне робяць для тавараў, якія ўвозяць праз Польшчу і Літву з Калінінградскай вобласці Расеі.
Пастанова з невядомых прычынаў не закранае Латвію. Гэтую краіну таксама слаба закрануў міграцыйны крызіс на беларускіх межах, асноўны цяжар якога паклаўся спачатку на Літву, потым на Польшчу. Пастанову супраць Літвы прынялі праз два дні пасля захопу Беларуссю самалёта «Ryanair».
У пункце пра цану пломбы 5 базавых велічыняў замянілі на 10: цяпер адзін «жучок» каштуе 290 рублёў. Калі ўводзілі пломбы для літоўскіх грузаў, адна каштавала 3 базавыя або 87 рублёў.
Яшчэ калі пломбы каштавалі 3 базавыя, літоўцы казалі пра мільённыя страты – прынамсі па 600 тысяч еўра на месяц на грузы, якія ідуць з Літвы праз Беларусь. Разважалі, што рашэнне змусіць шукаць літоўскіх перавознікаў шляхі ў абыход Беларусі, а еўрапейскіх – у абыход Літвы. Асацыяцыя аўтамабільных перавознікаў Літвы «Linava» спадзявалася, што іншыя краіны прымуць аналагічныя правілы для грузаў з Беларусі.
АА belsat.eu