Беларускія дэмсілы і ЗША могуць стварыць працоўную групу па вызваленню палітвязняў
Прадстаўніца Аб’яднанага пераходнага кабінету Вольга Гарбунова распавяла журналістам пра ідэю стварыць сумесную працоўную групу па пытанні вызвалення палітвязняў.
Ініцыятыва была агучана ў Вашынгтоне на адной з першых панэляў у рамках стратэгічнага дыялогу паміж ЗША і беларускімі дэмакратычнымі сіламі.
«Усё, што мы распавядалі нашым партнёрам, – гэта тая рэальнасць, у якой жывуць палітвязні, знаходзячыся ў месцах несвабоды. Мы прыводзілі рэальныя кейсы, гісторыі знікнення вядомых палітычных дзеячаў. Распавядалі пра новую тэндэнцыю 2023 года – інкамунікада. Распавядалі пра гуманітарны спіс, пра тое, што людзям тэрмінова неабходна медычная дапамога і мы павінны рабіць спробы іх вызвалення», – заявіла прадстаўніца АПК.
Гарбунова назвала ЗША «важным стратэгічным партнёрам» у гэтым пытанні, бо яны маюць вялікі досвед вызвалення людзей у розных краінах, у тым ліку палітзняволеных амерыканскіх грамадзянаў.
«Па сутнасці, гэта тое, што хочам рабіць мы. Мы, беларусы, хочам вызваляць грамадзянаў Беларусі, якія знаходзяцца ў зняволенні ва ўласнай краіне. З тых кірункаў, якія мы прапанавалі да разгляду, – гэта стварэнне двухбаковай працоўнай групы, куды ўвайшлі б прадстаўнікі як з беларускага боку ад імя дэмакратычных сілаў, так і з боку ЗША, каб у рамках гэтай працоўнай групы па пошуку шляхоў вызвалення маглі сустракацца эксперты, маглі выпрацоўвацца і рэалізоўвацца канкрэтныя планы дзеянняў», – сказала Гарбунова.
Гарбунова патлумачыла, што ў бліжэйшыя дні будзе абмяркоўвацца магчымы склад беларуска-амерыканскай працоўнай групы па палітвязнях. Яна таксама падкрэсліла, што маецца на ўвазе не перамоўная або кантактная група, якая магла б размаўляць з афіцыйным Менскам. Задачы працоўнай групы будуць іншымі.
«Безумоўна, мы ўсведамляем рэальнасць і цяперашнія правілы гульні. Прадстаўнікі дэмакратычных сіл, тым больш палітычных структураў, не з’яўляюцца суб’ектамі для Лукашэнкі і тых, хто прымае такія рашэнні ў Беларусі. Размова хутчэй ідзе аб выпрацоўцы стратэгіі, крокаў, пошуку партнёраў, пошуку трэціх краін, якія гатовы будуць выступіць пасярэднікамі. Але дакладна нас не будзе ў рамках кантакту, дыялогу, нейкіх перамовах, звязаных ужо непасрэдна з Менскам», – адзначыла яна.
Акрамя таго, паводле прадстаўніцы АПК, беларускі бок закрануў пытанне аб недастатковасці рэсурсаў для рэабілітацыі палітвязняў, якія ўжо выйшлі на свабоду, і перспектывах стварэння міжнароднага фонду падтрымкі палітзняволеных.
Гарбунова адзначыла, што ёй асабіста было вельмі важна, што тэма палітвязняў была прыярытэтнай «і, прынамсі, эмацыйны водгук і каментары нашых партнёраў гавораць пра тое, што ім зразумелы гэты боль».
Глеб Нержын belsat.eu
