Кіраўнік «ByPol» растлумачыў гнеўны спіч Лукашэнкі пра А-50 незадаволенасцю Крамля
Кіраўнік «ByPol» Аляксандр Азараў у каментары «Белсату» растлумачыў, чаму Аляксандр Лукашэнка настолькі эмацыйна распавядаў пра дыверсію ў Мачулішчах. Азараў мяркуе, што «акцыя мела наступствы з боку Расеі».
Кіраўнік «ByPol» Аляксандр Азараў зняпраўдзіў заяву Аляксандра Лукашэнкі пра затрыманне датычнага да атакі на расейскі самалёт-лакатар. Азараў зноў запэўніў «Белсат», што ў Беларусі няма нікога, хто ўдзельнічаў у дыверсіі:
«Удзельнікі акцыі выехалі за мяжу. Гэтых людзей, якіх затрымліваюць нібыта за датычнасць да дыверсіі, мы не ведаем».
Азараў мяркуе, што танальнасць прамовы Лукашэнкі сведчыць пра прэтэнзіі Крамля:
«Акцыя была вельмі значная, мела вялікі грамадскі рэзананс і, як выглядае, мела для Лукашэнкі наступствы з боку Расеі, пра якія мы не ведаем. І каб не ўпасці ў гразь тварам, Лукашэнка прызначыў вінаватага».
Кіраўнік «ByPol» пры гэтым адмовіўся нейкім чынам даказаць, што партызаны сапраўды выехалі з краіны, сказаўшы, што бліжэйшым часам ніякіх падрабязнасцяў абнародаваць не будзе праз захады бяспекі:
«Правядзенне любых акцыяў – гэта вельмі небяспечна, звязана з рызыкаю для жыцця. І раскрыццё дэталяў таксама можа прывесці да вялікай рызыкі. Таму мы не можам раскрываць інфармацыю больш падрабязна, чым мы сказалі».
Аляксандр Лукашэнка сёння заявіў, што «няўдалы тэракт» рыхтавала СБУ разам з ЦРУ і што датычыныя да дыверсіі, у тым ліку аператар дронаў, затрыманыя.
Атака на расейскі самалёт А-50 у Мачулішчах адбылася 26 лютага. Адказнасць за дыверсію ўзяў на сябе «ByPol». Спачатку дзяржаўныя медыі перадавалі, што інфармацыя пра атаку – фэйк, самалёт, які каардынаваў ракетныя абстрэлы Украіны, не пацярпеў. Аднак праз некалькі дзён ён паляцеў на рамонт у расейскі Таганрог.
Сяргей Крот belsat.eu
