Намеснік начальніка ГУБАЗіК Міхаіл Бядункевіч лічыць, што калі спыніць пераслед іншадумцаў, то «яны зноў пачнуць працаваць супраць нас». Пра гэта ён заявіў у інтэрв’ю прапагандысту Рыгору Азаронку.
Паводле Бядункевіча, «часам дзесьці праскоквае на розных рэсурсах і ў розных сродках масавай інфармацыі такія вось пасылы, што можа мы ўжо перамаглі, можа пара дараваць, можа пара адстаць». Але намеснік начальніка ГУБАЗіК з гэтым не згодны.
«Калі не працаваць над гэтым, дык тады яны зноў пачнуць працаваць супраць нас. Зʼявяцца і адужэюць тыя ж схаваныя ячэйкі, будуць развівацца ініцыятывы, будзе ісці праца па падрыву дзяржавы знутры, будуць шкодзіць, гадзіць. Калі не будзем працаваць зноў могуць быць перадумовы да тых праблем, якія ўзніклі ў нас не так даўно», – сказаў Бядункевіч.
Намеснік начальніка ГУБАЗіК абяцае працягваць палітычныя рэпрэсіі:
«Калі яшчэ да кагосьці не дайшлі, то гэта ня значыць, што яны невядомыя. Проста, магчыма, цяпер гэта не трэба рабіць. Прыйдзе час, мы ўсё гэта раскажам і пакажам».
Бядункевіч паказаў Азаронку «трафеі ГУБАЗіК» – каробку з рэчамі, канфіскаванымі ў рэпрэсаваных беларусаў. Сярод такіх «трафеяў»: бел-чырвона-белыя сцягі, значкі з «Пагоняй» і з выявай Кастуся Каліноўскага, а таксама камізэлькі «Прэса», у якіх журналісты працавалі на акцыях пратэсту.
Глеб Нержын belsat.eu
