Украінскае прадпрыемства «Енергоатом» паведамляе, што расейскія вайскоўцы абстрэльваюць Запарожскую АЭС, каб знішчыць яе інфраструктуру ды адлучыць ад энергасістэмы Украіны.
«Акты ядравага тэрарызму на Запарожскай АЭС – яе артылерыйскія абстрэлы – пераследуюць мэту разбурэння інфраструктуры станцыі, пашкоджанні ўсіх электралініяў, праз якія выдаецца электраэнергія ў энергасістэму Украіны, адлучаецца электрычнасць на поўдні краіны», – заявіла ўкраінскае прадпрыемства.
«Енергоатом» сцвярджае, што расейцы перайшлі да «сцэнара разбурэнняў, стварэння ядравай і радыяцыйнай аварыі на ЗАЭС, таму абстрэлы станцыі, з высокай верагоднасцю, працягнуцца».
Украінскі бок заклікае ААН, МАгАтЭ ды іншыя міжнародныя арганізацыі дамагчыся вываду расейскіх вайскоўцаў з ЗАЭС.
«Сітуацыю значна ўскладняе размяшчэнне захопнікамі сваёй вайсковай тэхнікі са зброяй і выбухоўкай у машынных залах энергаблокаў № 1 і № 2, што ёсць фактычным мініраваннем энергаблокаў з двума ядравымі рэактарамі найбуйнейшай у Еўропе атамнай электрастанцыі. І гэта ў дадатак да мініравання берагавой лініі ЗАЭС па лініі ахаладжальных басейнаў і найбліжэйшага берага Кахоўскага вадасховішча.
Неўзабаве ўсё гэта можа прывесці да ядравай і радыяцыйнай катастрофы, наступствы якой адчуе не толькі Украіна, але і ўся Еўропа», – дадалі ў прадпрыемстве.
Украінскія ўлады заяўляюць, што расейскія вайскоўцы неаднаразова абстрэльвалі ЗАЭС. Кіраўнік Офісу прэзідэнта Украіны Міхайла Падаляк адзначыў, што падчас абстрэлаў 5 жніўня Запарожская АЭС «цудам не ўзляцела ў паветра». Ён абвінаваціў Расею ў правакацыях і заклікаў міжнародныя арганізацыі дабіцца, каб АЭС перадалі пад кантроль спецыяльнай камісіі. Мэр Энэргадару Дмытро Арлоў паведаміў, што ў горадзе праз абстрэлы АЭС пачалася паніка.
Кіраўнік МАгАтЭ Рафаэль Гросі заявіў, што захопленая расейскімі вайскоўцамі АЭС «цалкам выйшла з-пад кантролю», на станцыі «парушаныя ўсе прынцыпы ядравай бяспекі».
Аналітыкі Інстытуту вывучэння вайны (ISW) лічаць, што расейскія войскі выкарыстоўваюць Запарожскую атамную электрастанцыю, каб узмацніць страх ядравай катастрофы і знізіць жаданне Захаду падтрымліваць Украіну.
Улады Расеі ў сваю чаргу вінавацяць у абстрэлах атамнай станцыі ўкраінскую армію.
Глеб Нержын belsat.eu