У вёсцы Шолтазера, што ў Карэліі ў Расеі мясцовая адміністрацыя не змагла прызваць у войска ніводнага мужчыну. Апынулася, што ўсе сышлі ў лясы па журавіны, піша выданне «Baza».
Мясцовая адміністрацыя карэльскай вёскі Шолтазера ў межах мабілізацыі спрабавала дазваніцца да прызыўнікоў і апавяшчаць іх праз сацсеткі, патрабуючы зʼявіцца на мабілізацыю. Але плёну намаганні чыноўнікаў не прынеслі і ніхто не зʼявіўся ў ваенкамат. Пазней стала вядома, што ўсе мужчыны з вёскі сышлі ў лясы за журавінамі. Пры гэтым не вядома, дзе дакладна цяпер мужчыны.
Актывісты ў Карэліі кажуць, што па гэтай жа прычыне правалілася мабілізацыя прызыўнікоў і ў іншай вёсцы Рыбрэка. У гэтых вёсках традыцыйна жыве карэнны фіна-вугорскі народ.
Чыноўнікі апраўдваюцца, што жыхары штогод у канцы верасні ідуць за ягадамі ў закінутыя вёскі і паляўнічыя домікі недзе ў лясах.
Мабілізацыя ў Расеі была абвешчаная 21 верасня 2022 г.
Алена Аляксандрава belsat.eu
