Падкантрольны спецслужбам канал «Сводки центра» паведаміў пра затрыманне менскага айцішніка, які крытычна выказваўся пра ўладу ў Беларусі і РФ у закрытым працоўным чаце.
Паводле сілавікоў, на праграміста данеслі «неабыякавыя і адэкватныя» калегі.
На «пакаянным» відэа айцішнік кажа, што ён быў затрыманы за тое, што ў працоўным чаце напісаў «дрэнныя рэчы пра прадстаўнікоў закону, бягучай улады і ўлады РФ». У відэа таксама быў паказаны скрыншот з паведамленнем, якое, імаверна, стала прычынай затрымання: «А яшчэ вусаты сын шлю… кхм… таракан уводзіць законы аб расстрэле здраднікаў радзімы і пазбаўленні экстрэмістаў грамадзянства. Здаецца, ён хоча, каб вы выходзілі толькі на фронт, а не на вуліцы, як у мінулы раз».
Назва чату, дзе было размешчанае паведамленне, – «Innowise Minsk». Магчыма, гаворка ідзе аб працоўным чаце буйной IT-кампаніі «Innowise Group».
Паводле каналу «Сводки центра», падчас дадатковай праверкі высветлілася, што айцішнік браў удзел у пратэстах 2020 года. Сілавікі распачалі крымінальную справу.
Глеб Нержын belsat.eu