Губернатар памежнай з Беларуссю Смаленскай вобласці Расеі Васіль Анохін у сваім тэлеграм-канале паведаміў 1 кастрычніка пра атаку ўкраінскіх дронаў на сталіцу рэгіёну.
«Сёння раніцай сіламі СПА і РЭБ у Задняпроўскім раёне гораду Смаленска былі задушаныя тры ўкраінскія беспілотнікі самалётнага тыпу. Пацярпелых няма. Аператыўныя службы працуюць на месцы», – распавёў губернатар.
Тым часам падпісчыкі тэлеграм-каналу «Ateo Breaking» паведамляюць, што ў Смаленску ў раёне авіязаводу прагучалі некалькі выбухаў.
Выданне таксама публікуе відэа пралёту дронаў.
Атаку беспілотнікаў на Смаленск пацвердзілі ў Міністэрстве абароны Расеі. Там таксама заявілі, што адзін дрон атакаваў Краснадарскі край.
У сваю чаргу губернатар Белгародскай вобласці Вячаслаў Гладкоў паведаміў пра абстрэл з боку Украіны раёну цэнтральнага рынку ў Шабекіне. Паводле яго, ёсць трое пацярпелых з аскепкавымі раненнямі. Таксама пашкоджаныя фасады гандлёвых павільёнаў на рынку, муніцыпальныя гаражы і тры аўтамабілі.
Расея ў ноч на 1 кастрычніка нанесла чарговы масавы ўдар па Украіне. Як паведамілі ў Генштабе ЗСУ, сярод іншага былі ўжытыя каля 40 іранскіх ударных БПЛА тыпу «Shahed-136/131». Украінскія сілы і сродкі супрацьпаветранай абароны знішчылі 30 варожых дронаў у межах Адэскай, Мікалаеўскай і Вінніцкай вобласцяў. Авіяцыйныя ўдары таксама зазналі Чарнігаўская, Луганская, Данецкая, Запарожская, Херсонская вобласці.
Агулам Расея нанесла 8 ракетных і 99 авіяцыйных удараў, здзейсніла 45 абстрэлаў з рэактыўных сістэм залпавага агню як па пазіцыях украінскіх войскаў, так і па грамадзянскіх аб’ектах. У выніку расейскіх атак беспілотнікамі ёсць загінулыя і параненыя сярод цывільнага насельніцтва.
Якуб Хруст belsat.eu
