Прэзідэнт ЗША Джо Байдэн падпісаў закон аб часовым бюджэце, які прадугледжвае фінансаванне ўрада да 17 лістапада 2023 года. Закон дазволіць пазбегнуць шатдаўна, які мог наступіць 1 кастрычніка.
Як адзначае Бі-Бі-Сі, яшчэ раніцай у суботу шатдаўн (так у Амерыцы называюць спыненне фінансавання бюджэтнікаў) здаваўся непазбежным. Але Сенат, які кантралюецца дэмакратамі, у выніку прыняў узгоднены з ніжняй Палатай прадстаўнікоў кампрамісны закон.
Часовы бюджэт прадугледжвае павелічэнне федэральнай дапамогі на ліквідацыю наступстваў стыхійных бедстваў да $ 16 млрд, у адпаведнасці з запытам адміністрацыі Джо Байдэна, але не прадугледжвае сродкаў на дапамогу Украіне, канстатуе «Голас Амерыкі».
Аднак пытанне аб дапамозе Украіне не здымаецца з парадку дня. «Мы ні пры якіх абставінах не можам дазволіць, каб амерыканская падтрымка Украіны была спынена», – заявіў Байдэн. Прэзідэнт заклікаў Кангрэс забяспечыць перадачу сродкаў, «неабходных для дапамогі Украіне ў гэты крытычны момант».
Лідары апазіцыйных фракцыяў рэспубліканцаў у абедзвюх палатах сказалі, што большасць іх аднапартыйцаў поўныя рашучасці прадоўжыць эканамічную і вайсковую дапамогу Кіеву.
Сітуацыю з часовым бюджэтам ЗША ўжо пракаментавалі ў Кіеве. Спікер украінскага МЗС Алег Ніколенка патлумачыў, што часовы бюджэт не паўплывае на абвешчаную раней дапамогу Украіне. Маецца на ўвазе каля $ 1,6 млрд на абаронную сферу і $ 1,23 млрд прамой бюджэтнай падтрымкі, а таксама сродкі на гуманітарныя і энергетычныя праекты. Паводле Ніколенкі, негатыўны ўплыў на дапамогу Украіне мог бы мець шатдаўн.
«Цяпер украінская ўлада актыўна працуе з амерыканскімі партнёрамі, каб новыя бюджэтныя рашэнні ЗША, якія будуць распрацаваныя цягам наступных 45 дзён, уключалі новыя сродкі для дапамогі Украіне», – дадаў спікер МЗС.
Як адзначае Бі-Бі-Сі, шатдаўн – звычайная справа ў ЗША. Апазіцыя часта ператварае руціннае бюджэтнае галасаванне ў палітычны гандаль, каб прымусіць сваіх супернікаў у Белым доме пайсці на саступкі. З 1981 года шатдаўны ў ЗША здараліся 14 разоў. Звычайна на дзень-два, але бывала і даўжэй.
Глеб Нержын belsat.eu