Сотні людзей пікетуюць пад будынкам Белтэлерадыёкампаніі.
Каля будынку Белтэлерадыёкампаніі на вуліцы Макаёнка сабраўся натоўп, які скандуе «Паказвайце праўду!», «Свабоду», «Мы ўлада» і інш. У Беларусі адбываецца сёмы дзень пікетаў.
Тысячы беларусаў яшчэ раніцай 15 жніўня сабраліся на развітанне з Аляксандрам Тарайкоўскім, загінулым падчас мірных пратэстаў каля метро «Пушкінская». Тарайкоўскі – першы загінулы падчас пратэстаў у Беларусі, смерць якога ўлады пацвердзілі афіцыйна.
Пазней людзі выйшлі на плошчу каля Дома ўраду, а таксама мноства жыхароў Менску сабраліся каля будынку Белтэлерадыёкампаніі на вуліцы Макаёнка.
Працаўнікі беларускага тэлебачання нечакана заявілі, што далучаюцца да мітынгоўцаў і запатрабавалі ад свайго старшыні Івана Эйсманта спыніць паказваць хлусню і расказаць праўду пра катаванні сілавікоў. На будынку з’явіўся бел-чырвона-белы сцяг.
Улагоджваць канфлікт прыбылі Наталля Качанава і Наталля Эйсмант.
Некалькі амапаўцаў зайшлі ў будынак Белтэлерадыёкампаніі. Пратэстоўцы, калі яны з’явіліся, абурыліся і скандавалі «Не забудзем! Не прабачым!»