Марыю Калеснікава раніцай 7 верасня каля Нацыянальнага мастацкага музею невядомыя людзі пасадзілі ў мікрааўтобус з надпісам «Сувязь» і павезлі ў невядомым кірунку, падае TUT.BY са спасылкаю на відавочцаў.
Сваякі Марыі Калеснікавай падалі заяву ў міліцыю па факце знікнення. У міліцыі сказалі, што заява прынята, Марыю шукаюць, паведаміў увечары афіцыйны Тэлеграм-канал Віктара Бабарыкі.
Прэс-сакратар Каардынацыйнай Рады Антон Раднянкоў для каментароў не даступны.
Таксама няма сувязі з выканаўчым сакратаром Рады Іванам Краўцовым.
Прэс-служба МУС не каментуе сітуацыю.
Міністр замежных спраў Літвы Лінкас Лінкявічус пракаментаваў выкраданне Марыі Калеснікавай.
«Замест размовы з жыхарамі Беларусі, дзейнае кіраўніцтва спрабуе цынічна ліквідаваць іх па чарзе. Выкраданне Марыі Калеснікавай у цэнтры Менску – ганьба. Гэта можна параўнаць са сталінскімі метадамі НКУС, што ужываюцца ў Еўропе XXI стагоддзя. Яе неабходна неадкладна вызваліць», – напісаў ён у сваім Twitter.
На мінулым тыдні была затрыманая чалец Каардынацыйнай рады Лілія Уласава, супраць яе заведзеная крымінальная справа.
Чальцы прэзідыуму Каардынацыйнай Рады Павел Латушка і Вольга Кавалькова зараз знаходзяцца за межамі Беларусі.
- 20 жніўня Генеральная пракуратура распачала справу паводле артыкулу 361 (заклікі да захопу ўлады) Крымінальнага кодэксу, які пагражае тэрмінам зняволення да 5 гадоў.
- «Стварэнне і дзейнасць Каардынацыйнай рады накіраваныя на захоп дзяржаўнай улады, а таксама на прычыненне шкоды нацыянальнай бяспецы Рэспублікі Беларусі. На падставе гэтага факту заведзеная крымінальная справа паводле артыкулу 361 Крымінальнага кодэксу», – заявіў генеральны пракурор.
