Міністр замежных спраў Беларусі Уладзімір Макей распавёў, што ён кантактаваў з носьбітам каронавірусу – праз гэта яму давялося абмежаваць свае кантакты. Тэсты міністра на наяўнасць вірусу адмоўныя.
Пра гэта Макей паведаміў у эфіры АНТ.
«Сапраўды былі нейкія кантакты з носьбітам вірусу, таму лекарамі было прынята рашэнне выконваць пэўныя абмежаванні, што я і рабіў. Тэсты былі адмоўныя, таму ўсе нармальна, сёння нармальны працоўны рэжым», – сказаў міністр.
Ён адзначыў, што падчас чакання вынікаў тэсту не быў у 14-дзённай ізаляцыі, а працаваў і кантактаваў з калегамі.
«Імкнуліся абмежаваць гэтыя кантакты па мінімуме. І калегі, з якімі кантактаваў, таксама здавалі тэсты – усё нармальна», – дадаў ён.
Нагадаем, Беларусь – адна з нешматлікіх краін свету і адзіная ў сваім рэгіёне, дзе дагэтуль афіцыйна не ўведзены каранцін. Аляксандр Лукашэнка сцвярджае, што ад вірусу ратуе хакей, трактары, лазня і гарэлка.
КА belsat.eu