Аляксандр Лукашэнка ў сюжэце, які быў паказаны ў эфіры тэлеканалу «Беларусь 1», распавёў, як вырашалася праблема з бруднай вадой у Менску.
Паводле кіраўніка Беларусі, ён даведаўся пра праблемы з вадой у Менску, калі быў у Маскве.
«Ну, думаю, дакладна, як дзяцей, нельга на хвіліну пакінуць, запалкі хаваць ад іх ужо трэба, каб не спалілі краіну. Ну, думаю, назіраю…» – сказаў ён.
Лукашэнка заявіў, што надзвычайнае здарэнне адбылося праз тое, што падчас рамонту застаялая вада трапіла ў трубы. Калі ўбачылі, што яна не вельмі добрая, яе сталі чысціць рэагентамі і перавысілі дозу. Але, дадаў кіраўнік краіны, раніцай наступнага дня брудны запах ужо быў ліквідаваны.
«Дыктатура – гэта дрэнна. А калі за ноч вырашылі праблему найцяжэйшую, дыктатура – гэта добра. Пры чым тут дыктатура? Павінна быць адказнасць», – сказаў ён.
Паводле яго, паколькі ў Беларусі няма нафтадолараў, грашыма праблему не зальеш гэтую, таму павінны быць дысцыпліна і адказнасць.
Праблема з бруднай вадой у Менску ўзнікла 24 чэрвеня. Вада з моцным пахам фіксавалася ў Маскоўскім і Фрунзенскім раёнах, а таксама ў частках Кастрычніцкага і Цэнтральнага. Толькі 27 чэрвеня Міністэрства аховы здароўя паведаміла, што забароны на выкарыстанне вады ў Маскоўскім і Фрунзенскім раёнах знятыя.
МГ belsat.eu