Мітрапаліт Тадэвуш Кандрусевіч выступіў з афіцыйным зваротам да Аляксандра Лукашэнкі і да ўсіх, хто выконвае ўладу на розных узроўнях.
У адкрытым лісце кіраўнік каталіцкай царквы ў Беларусі Тадэвуш Кандрусевіч падкрэсліў важнасць міру ў Беларусі.
«Наша Бацькаўшчына перажывае складаны час, які, на вялікі жаль, ужо азмрочаны пралітаю крывёю, тысячамі затрыманых і жорстка збітых мірных жыхароў, якія хочуць ведаць праўду пра прэзідэнцкія выбары, што адбыліся 9 жніўня», – гаворыць Кандрусевіч.
Ён падкрэсліў, што пралітая кроў дэманстрантаў і катаванні ў месцах утрымання – гэта цяжкі грэх, які вядзе дэстабілізацыі і згубных падзелаў у нашым грамадстве. Як выйсце ён бачыць цяжкі і няпросты шлях пакаяння, духоўнага і маральнага ачышчэння, без чаго немагчыма пераадоленне грамадска-палітычнага крызісу.
«У імя такога неабходнага міру ў нашай Айчыне і нацыянальнай згоды, я звяртаюся да дзяржаўных уладаў Рэспублікі Беларусь з заклікам распачаць канструктыўны дыялог з грамадствам, спыніць насілле і неадкладна вызваліць усіх затрыманых на мірных акцыях нявінных грамадзянаў».
Раней кіраўнік БПЦ, мітрапаліт Менскі і Заслаўскі, Патрыяршы экзарх усёй Беларусі Павел заклікаў Лукашэнку зрабіць усё, каб спыніць гвалт.
КТ belsat.eu