Некалькі заяваў, а таксама 1,2 мільярда еўраў крэдыту ад Францыі – так завяршыліся перамовы Уладзіміра Зяленскага з Эманюэлем Макронам.
Глядзіце сюжэт у нашым відэа:
«Трэба быць стрыманым. Хачу павітаць вашу вытрыманасць і стрыманасць пры такой канцэнтрацыі войскаў на мяжы. Францыя і Нямеччына будуць працягваць выконваць ролю пасярэднікаў, каб урэгуляваць канфлікт», – заявіў Эманюэль Макрон.
Прамова ж Уладзіміра Зяленскага была накіраваная не толькі да прэзідэнта Францыі, але і да Уладзіміра Пуціна.
«Украіна вельмі цярплівая, бо гэта мудрасць. Я думаю, што гэта важна не толькі для Украіны, але і для ўсёй Еўропы. І вельмі важна для расейцаў», – адказаў Пуціну прэзідэнт Украіны.
Так Уладзімір Зяленскі адказаў на словы расейскага прэзідэнта пра абавязак Кіева выконваць Менскія пагадненні.
«Прэзідэнт дзейны заявіў, што яму ніводзін пункт не падабаецца з гэтых Менскіх пагадненняў. Ну, падабаецца – не падабаецца, цярпі, мая прыгажуня! Трэба выконваць!» – заявіў у панядзелак Уладзімір Пуцін.
Гэтыя словы прагучалі напярэдадні на прэс-канферэнцыі па выніках перамоваў расейскага і французскага прэзідэнтаў у Маскве.
Пуцін абвінаваціў ЗША і NATO у тым, што тыя цалкам праігнаравалі ключавыя патрабаванні Расеі. А менавіта: непашырэнне NATO на ўсход, неразмяшчэнне ўдарных сістэмаў ля межаў краіны і вяртанне Альянсу да межаў 1997 года. Эманюэль Макрон таксама не стаў адмаўляць рознагалоссяў паміж NATO і Расеяй ды заявіў, што з Пуціным яны абмеркавалі канкрэтныя спосабы дээскалацыі. Іх Эманюэль Макрон хоча абмеркаваць з Кіевам, Вашынгтонам ды іншымі саюзнікамі ў Еўразвязе і NATO.
«Ні Расея, ні еўрапейцы не хочуць хаосу і нестабільнасці ў той час, калі людзі і кантынент так моцна пацярпелі ад пандэміі. Усе імкнуцца да аднаўлення і міру», – заявіў Макрон.
Што менавіта гэта за дамоўленасці, не паведамляецца. Зрэшты, «ФайнЭншал Таймз» са спасылкаю на крыніцу ва ўрадзе Францыі піша, што пагадненне прадугледжвае вывад расейскіх войскаў з Беларусі пасля завяршэння вучэнняў у абмен на адмову NATO прымаць у склад Украіну і Грузію. У Крамлі існаванне якой-небудзь дамоўленасці абверглі, спаслаўшыся на ўкраінскую Канстытуцыю, якая замацавана ўступленне ў Паўночнаатлантычны альянс.
«Ёсць Канстытуцыя і дактрынальныя дакументы Украіны, дзе гаворка ідзе хутчэй аб антыфінляндызацыі Украіны», – пракаментаваў перамовы Дзмітрый Пяскоў.
Ад ваяўнічай рыторыкі да заяваў пра санкцыі перайшлі ў Вашынгтоне. Там адбыліся перамовы прэзідэнта ЗША Джо Байдэна і канцлера Нямеччыны Оляфа Шольца.
«Калі Расея ўварвецца, то бок танкі ці войскі зноў пяройдуць мяжу Украіны, тады «Паўночнай плыні – 2» больш не будзе. Мы пакладзём ёй канец», – заявіў Джо Байдэн.
Нямецкі канцлер пра «Паўночную плынь» нічога канкрэтнага не сказаў. Але з амерыканскім прэзідэнтам пагадзіўся: адказ будзе рашучым і будзе прыняты разам. Наперадзе яшчэ адна сустрэча Оляфа Шольца адносна расейска-ўкраінскага канфлікту, ужо ў Германіі. З лідарам Францыі Эманюэлем Макронам, а таксама прэзідэнтам Польшчы Анджэем Дудам.
Міхаіл Прановіч, «Белсат»