У Бруселі адбылося 8-е паседжанне каардынацыйнай групы ЕЗ-Беларусь. Па выніках двухбаковай сустрэчы разглядаліся шэраг пытанняў, у тым ліку і падпісанне дамовы аб спрашчэнні візавага пытання і рэадмісіі, паведамляецца ў прэс-рэлізе ЕЗ.
Паседжанне каардынацыйнай групы ЕЗ-Беларусь апрйшло ў Бруселі 17-18 снежня. Падчас працоўных сустрэчаў бакі абмеркавалі шэраг пытанняў, сярод якіх і правы чалавека. Акрамя таго, ЕЗ зноў заявіў пра непрыманне смяротнага пакарання і заклікаў увесці мараторый.
Каардынацыйнай група таксама абмеркавала дапамогу ЕЗ Беларусі. Па выніках сустрэчы ўжо 19 снежня Рада ЕЗ распачала перамовы па пагадненні аб мытнай супрацы і ўзаемнай адміністрацыйнай дапамозе Беларусі.
Акрамя іншага ў Бруселі нагадалі, што 2 лютага 2020 года ўступіць у сілу Візавы кодэкс ЕЗ, паводле якога візавы збор павялічыцца да 80 еўраў. Аднак у ЕЗ такое павелічэнне называюць часовым. Пасля ўступлення ў сілу Пагаднення аб спрашчэнні візавага рэжыму візавы збор для беларусаў аўтаматычна знізіцца з 80 да 35 еўраў.
Паводле TUT.BY 19 Снежня Рада ЕЗ зацвердзіла рашэнне аб падпісанні з Беларуссю пагаднення аб рэадмісіі. Але для ўступлення ў сілу яно павінна быць апублікавана ў Афіцыйным часопісе ЕЗ.
ЕЗ прапанаваў Беларусі падпісаць дамову аб рэадмісіі ў студзені 2020 года.
Раней выказвалася меркаванне, што праект будзе падпісаны падчас наведвання Менску кіраўніцы дыпламатыі ЕЗ Фэдэрыкі Магерыні 4 кастрычніка. Але ў выніку візіт быў адменены.
СК belsat.eu