Журналісты «Белсату» наведалі рынкі Берасця, каб даведацца па чым маладая бульба, гародніна і ягады.
Большасць апытаных намі берасцейцаў прызнаецца: дорага! І сапраўды кошты высокія, асабліва на ягады, ад 10 рублёў за кілаграм.
Першыя клубніцы і чарэшня, капуста, бульба на беларускія рынкі ішлі з Азербайджану. У пачатку траўня маладая бульба з гэтай краіны каштавала 6 рублёў, а ягады каля 20 рублёў. Зараз кошты натуральна сталі ніжэй, але шмат для каго гэтыя тавары застаюцца недасяжнымі.
Напрыклад, кілаграм маладой бульбы цяпер каштуе 2,5 – 3 рублі, у асноўным яна ўкраінская, але ўжо пайшла і першая беларуская. Таму варта чакаць, што праз некалькі тыдняў цэны знізяцца. Да прыкладу бульба з мінулага сезону каштуе ад 50 да 70 капеек.
Агуркі на рынках Берасця можна набыць ад 2.30 да 3 рублёў за кілаграм, за месяц яны патаннелі ўдвая. Кілаграм радыскі абыдзецца ў 3,5 рублі, хаця яшчэ месяц таму пучок (200 – 300 грамаў) каштаваў 2 – 2,5 рублі. Кошт мясцовай маладой капусты – 1.50. Цікава, што ў «Кароне» капуста з Казахстану на 35 капеек танней. А вось свежы часнык наадварот таннейшы на рынку – 7-8 рублёў, у той час як у крамах – 16-18.
Ягады сапраўды не танныя: маліна з Берасцейскага раёну абыдзецца вам у 30 рублёў. Калі раней кошты за чарэшні з Азербайджану трымаліся ў раёне 20 рублёў, то цяпер на рынку з’явілася ягады з Грэцыі і Украіны за 12- 14 рублёў. А вось клубніцы прадаюцца выключна беларускія: Камянец, Берасцейскі раён, Маларыта, Драгічын, але кошты пакуль трымаюцца на ўзроўні ад 10 да 13 рублёў.
Алесь Ляўчук, Мілана Харытонава (фота) Belsat.eu