Расейскі «Росатом» у пачатку жніўня плануе фізічны запуск Беларускай АЭС. Пра гэта ў сваім звароце заявіў кіраўнік карпарацыі Аляксей Ліхачоў.
«З галоўных навінаў на замежных будоўлях адзначу Беларусь, дзе актыўна працуем над атрыманнем дазволу на правядзенне фізічнага пуску. Разлічваем, што ён адбудзецца ў пачатку жніўня», – паведаміў Ліхачоў.
Напярэдадні прэм’ер-міністры Беларусі і Расеі Раман Галоўчанка і Міхаіл Мішусцін падпісалі ў Маскве тры дакументы ў сферы энергетыкі. Два дакументы датычаць змяненняў у міжурадавае пагадненне аб будаўніцтве БелАЭС.
Раман Галоўчанка падкрэсліў, што ўсе падпісаныя дакументы адпавядаюць інтарэсам Беларусі.
«Больш за тое, і па будаўніцтве атамнай станцыі, і па пастаўках энерганосьбітаў яны з’яўляюцца вельмі выгаднымі для нашай краіны. Магу сказаць, што толькі па будаўніцтве атамнай станцыі Беларусь атрымала эканомію, якая вылічаецца сотнямі мільёнаў долараў», – сказаў беларускі прэм’ер.
Сутнасць дамовы аб пастаўках нафты пакуль невядомая.
Супраць запуску БелАЭС актыўна выступае суседняя Літва, бо станцыя знаходзіцца вельмі блізка да яе сталіцы – Вільні.
МГ belsat.eu