«Сёння пералічваем», – гэтак міністр энергетыкі Уладзімір Патупчык адказаў яшчэ ў мінулую пятніцу на пытанне аб тым, калі Беларусь пагасіць недаплату перад Газпромам за расейскі газ у памеры $ 280 млн.
Але сёння ў прэсавай службе мінэнерга заявілі, што па-ранейшаму ня маюць інфармацыі аб тым, што плацёж быў праведзены. Прэсавы сакратар Савету міністраў паведаміў, што ўрад адмаўляецца каментаваць прычыны затрымкі. У Газпроме адказалі, што сітуацыя пакуль «няясная». Раней віцэ-прэмʼер Уладзмір Сямашка казаў, што будзе дамагацца ад Расеі адтэрміноўкі па гэтым плацяжы.
Але сёння намеснік міністра фінансаў Расеі Сяргей Сторчак заявіў, што пакуль Менск не даплаціць $ 280 млн., Масква, у сваю чаргу не пералічыць Беларусі абяцаную субсідыю на кампенсацыю часткі цаны за газ. Паводле выдання Камерсант, яна складае больш за $ 400 млн. То бок – значна больш, чым Беларусь цяпер вінаватая Газпрому.
Між тым, афіцыйны Менск працягвае ціснуць на Расею пагрозамі, прынамсі, часткова, адмовіцца ад закупу яе энергарэсурсаў. У прыватнасці – нафты.
«Я запатрабаваў ад ураду неадкладна знайсці альтэрнатыву новую і вярнуцца да старой. Мы дамовіліся, сёння танкер ідзе праз Адэсу – мы пачнем пастаўляць праз Украіну на Мазыр нафту для перапрацоўкі. Цяпер вядуцца перамовы з Іранам», – пагражаў Аляксандр Лукашэнка.
Як паведамляе адміністрацыя Адэскага порту танкер з Азербайджанскай нафтай для Беларусі на 84 тысячы тон прыбыў да месца назначэння ў мінулую сераду. Адтуль груз накіроўваецца ў Беларусь па чыгунцы. Адмыслоўцы, аднак, канстатуюць, што пры існай эканамічнай мадэлі Беларусь можа закупаць па сусветных коштах толькі нязначную долю вуглевадародаў, бо дзяржаўны сектар, які, у нашай краіне, складае больш за 70% ад эканомікі, не ў стане працаваць без расейскай энергетычнай субсідыі.
Станіслаў Івашкевіч, Менск, фота – censoru.net