У Беларусі змяншаецца маса і кошт тавараў, якія бязмытна можна ўвозіць у краіну. Такое рашэнне 1 лістапада прыняў Савет Еўразійскай эканамічнай камісіі (ЕЭК).
У сувязі з прынятымі зменамі, з 1 студзеня 2019 года ў Беларусь (як і іншыя краіны ЕАЭС) можна будзе ўвозіць тавары не даражэй за 500 еўра з агульнай вагой не больш за 25 кілаграмаў.
Нагадаем, што 29 сакавіка ўступіла ў сілу рашэнне Савету ЕЭК № 107, дзе гаворыцца пра зніжэнне нормы бязмытнага ўвозу тавараў для асабістага карыстання. Згодна з ім, да канца 2018 года жыхары краін ЕАЭС, якія вандруюць наземным транспартам, могуць прывозіць тавары на 1500 еўра і да 50 кілаграмаў.
З 2019 года нормы мусілі паступова ісці ў бок паніжэння. Так, ужо ў наступным годзе меркавалася дазволіць увозіць 50 кілаграмаў, але на суму не больш за 1000 еўра. У 2020-м – сумкі турыстаў мусілі схуднець да 35 кілаграмаў, а рэчы ў іх патаннець да 750 еўра. А вось у 2021 годзе прывозіць можна было б толькі 25 кілаграмаў тавараў не болей чым на 500 еўра. Такім чынам, абмежаванні, якія планавалася ўвесці толькі ў 2021 годзе, уступяць у сілу ўжо з 2019-га.
Калі тавар будзе правозіцца звыш ліміту, давядзецца заплаціць мыту ў памеры 30% ад кошту тавару, але не менш за 4 еўра за кожны лішні кілаграм. Гэтыя нормы не распаўсюджваюцца на асабістыя рэчы, якія людзі ўзялі з сабой у дарогу.
А вось ліміты на алкаголь з 2019 года не змяняюцца – не больш за 3 літры, у тым ліку піва, на аднаго паўналетняга чалавека. Пры ўвозе большых аб’ёмаў трэба заплаціць 10 еўра за кожны лішні літр. Правозіць больш за пяць літраў на аднаго чалавека забаронена.
МГ.
