Як паведаміў сёння Уладзімір Макей, прычынаю стаў «палітызаваны падыход партнёраў», перадае БелТА.
Адказ на санкцыі
Кіраўнік МЗС Уладзімір Макей заявіў, што гэта адказ на санкцыі з боку некаторых краінаў, у тым ліку і Еўрапейскага звязу.
«Вядома, мы не можам пакідаць падобнага роду рэчы без адказу. З нашага боку пашыраны таксама адпаведныя санкцыйныя спісы з уключэннем туды адпаведных асоб з усіх краін Еўразвязу. Мы прапанавалі прыпыніць працу каардынацыйнай групы «Беларусь – Еўразвяз», у рамках якой абмяркоўваліся розныя пытанні нашага ўзаемадзеяння », – растлумачыў Уладзімір Макей.
Сярод іншых захадаў – паніжэнне ўзроўню прадстаўніцтва Беларусі ва «Усходнім партнёрстве».
Гэта азначае, паводле ягоных слоў, што на мерапрыемствах «Усходняга партнёрства» Беларусь будуць прадстаўляць не кіраўнікі міністэрстваў, а іх эксперты. У выпадку правядзення саміту пытанні, якія тычацца Беларусі, хутчэй за ўсё будуць абмяркоўвацца на ўзроўні Пастаяннага прадстаўніка Беларусі пры Еўразвязе.
«У прынцыпе мы заўсёды былі настроены, настроены і будзем настроены на тое, каб санкцыйная рыторыка сыходзіла з нашага парадку дня. Але, на жаль, дзеянні нашых партнёраў не пакідаюць нам нічога іншага, акрамя як адэкватна рэагаваць на гэтыя негатыўныя крокі ў дачыненні да Беларусі. Яшчэ раз паўтаруся: ня мы былі ініцыятарамі гэтых крокаў. Мы толькі адэкватна рэагуем на тыя негатыўныя заявы і канкрэтныя дзеянні нашых заходніх партнёраў, звязаныя з умяшаннем ва ўнутраныя справы Беларусі», — кажа Макей.
Блеф афіцыйнага Менску
Але эксперты схільныя меркаваць, што гэткія паводзіны беларускага знешнепалітычнага ведамства – не больш чым блеф.
«Як палітычны сігнал навіна можа стаць моцнай. А вось як эканамічны складнік – удзел ва Усходнім партнёрстве вельмі пераацэнены актывістамі трэцяга сектару. Для іх палітыка ЕЗ у бок краінаў былога СССР надзвычай важная, для ўладаў – не. І такое рашэнне можна назваць, з аднаго боку, канстатацыяй факта, з іншага, палітыкай пад’ёму ставак. У той жа час, калі паглядзець на практычны аспект удзелу Беларусі ў Усходнім партнёрстве за мінулыя 4 гады (з моманту актывізацыі ўдзелу), канкрэтных рэзультатаў ня так багата», – падкрэслівае палітолаг Вольга Харламава.
Яна зазначае, што пасля пачатку актыўнай фазы палітычнага крызісу ды ўвядзенне першых санкцый, форумы Ўсходняга партнёрства, як і менш прадстаўнічыя пляцоўкі, заснаваныя ў межах гэтае палітыкі, маглі стаць месцам абмеркавання «беларускага пытання».
Але афіцыйны Менск сам пайшоў на абвастрэнне заявіўшы што сам паніжае «узровень удзелу».
«Першае, на што разлічвае атачэнне Лукашэнкі – фармат вяртанне. Адна справа калі цябе «папрасілі не ехаць», другая – калі ты не паехаў сам. Магчымая ініцыятыва па вяртанні на ранейшы ўзровень камунікацыі (у патрэбны момант) будзе ўспрынятае еўрапейскімі чыноўнікамі як пазітыўны сігнал. І дадатковых патрабаванняў да дыялогу можа ня быць», – кажа адмыслоўца.
Вольга Харламава перакананая: дадзенае рашэнне – гэта спроба блефу. Пасля стабілізацыі сітуацыі і пачатку палітыкі «продажу дыялогу па канстытуцыі» краінам ЕЗ, беларускі МЗС пацешыць навіною пра рашэнне вернуцца да старога фармату працы ў межах Усходняга партнёрства.
КТ belsat.eu
