У Беларусі зарэгістраваны 560 кандыдатаў у дэпутаты, якія будуць прэтэндаваць на 110 месцаў у Палаце прадстаўнікоў. Belsat.eu склаў гендарны, узроставы і партыйны партрэт сярэднестатыстычнага кандыдата ў дэпутаты па кожнай вобласці і гораду Менску.
Менск
Менск – самы прасунуты рэгіён Беларусі ў сэнсе ўзросту кандыдатаў. Сярэдні ўзрост тут самы нізкі ў Беларусі – 42 з паловаю годы. Менавіта ў Менску зарэгістраваны самыя маладыя і самыя старыя прэтэндэнты на месца ў Палаце прадстаўнікоў.
Самыя маладыя – актывіст кампаніі #учебаважнее Аляксей Лазараў і актывіст «Гавары праўду» Яўген Каравулаў.
Абодва нарадзіліся ў 1998 годзе і вылучаліся на выбарах ад Беларускай сацыял-дэмакратычнай партыі (Грамада).
Сярод самых маладых таксама – Алана Гебрамарыям, Марыя Васілевіч, Раман Роль, Даніла Лаўрэцкі (усе чацвёра нарадзіліся ў 1997 годзе).
Самыя старыя – 79-гадовыя Аляксандр Мялешчанка і Мікалай Амельяновіч. Абодва камуністы – Мялешчанка прадстаўляе праўладную КПБ, а Амельяновіч апазіцыйную партыю «Справядлівы свет».
Агулам у Менску зарэгістравана 16 кандыдатаў маладзейшыя за 30 гадоў. Тры кандыдата старэйшыя за 70 гадоў.
Менск таксама самы партыйны рэгіён – 80, 5% кандыдатаў тут маюць сяброўства ў палітычных партыях. У лідарах тут праўладныя Ліберальна-дэмакратычная партыя і Камуністычная партыя Беларусі – у іх 19 і 16 кандыдатаў адпаведна. На трэцім месцы апазіцыйная Абʼяднаная грамадзянская партыя – 13 кандыдатаў.
Са 123 зарэгістраваных кандыдатаў 93 мужчыны і 30 жанчын (24,3%).
Берасцейская вобласць
Берасцейшчына – самы прагрэсіўны рэгіён у плане гендарнай роўнасці. З 79 кандыдатаў у дэпутаты тут 26 жанчын – гэта 32,9%, самы высокі паказнік па Беларусі.
У плане ўзросту кандыдаты з Берасцейшчыны саступаюць толькі Менску і Менскай вобласці. Сярэдні ўзрост тут – 45,3 года. Зарэгістравана 8 кандыдатаў маладзейшых за 30 гадоў.
Самы маладыя – 22-гадовы студэнт БДАТУ Андрэй Курашык, прадстаўнік Беларускай патрыятычнай партыі. Ён балатуецца па Кобрынскай акрузе №12.
У тройку самых маладых таксама ўваходзяць Уладзіслаў Сыса і Святлана Лысенка. Яны балатуюцца па Берасцейскай-Усходняй акрузе №3.
Сыса – студэнт Варшаўскага ўніверсітэту. Лысенка – настаўніца ў вёсцы Яцкавічы.
Самы стары – 72-гадовы Аляксандр Зінчанка, сябра КПБ, дэпутат Палаты прадстаўнікоў у 2004-2008 гадах. Ён балатуецца ў Пружанскім раёне.
На Берасцейшчыне 59,5% кандыдатаў у дэпутаты – гэта прадстаўнікі палітычных партыяў. Сярод лідараў тут ЛДП (13 кандыдатаў) і БСДП (9).
Віцебская вобласць
Віцебшчына – самы кансерватыўны рэгіён у гендарным плане. З 78 зарэгістраваных кандыдатаў тут толькі 16 жанчын – 20,5%.
Сярэдні ўзрост кандыдатаў на Віцебшчыне адзін з самых высокіх у краіне – 47,2 года. У вобласці зарэгістравана толькі тры кандыдата маладзейшыя за 30 гадоў.
Самы малады – 26-гадовы Ягор Левачоў, які працуе ў ААТ «Анкор кадравыя рашэнні» і прадстаўляе кампанію «Гавары праўду».
Ён балатуецца па Лепельскай акрузе №23. У тройцы самых маладых таксама Мікалай Каваленка (Наваполацкая акруга №24) і Андрэй Мамякоў (Полацкая гарадская акруга №27). Абодва нарадзіліся ў 1990 годзе.
Мамякоў – начальнік камерцыйнага аддзелу ААТ «Гідрапрэс», вылучаўся ад Рэспубліканскай партыі працы і справядлівасці.
Каваленка – беспрацоўны, беспартыйны.
Самы стары – 70 гадовы Уладзімір Андрэйчанка, спікер Палаты прадстаўнікоў трох апошніх скліканняў. Ён балатуецца па Докшыцкай акрузе №22.
У Віцебскай вобласці сябрамі палітычных партыяў з’яўляюцца 61,5% кандыдатаў у дэпутаты. У лідарах тут ЛДП і КПБ – 14 і 12 кандыдатаў адпаведна.
Гомельшчына
Самы высокі сярэдні ўзрост кандыдатаў у Гомельскай вобласці – 47,6 гадоў. Тут толькі два кандыдата маладзейшыя за 30 гадоў.
Самы малады кандыдат на Гомельшчыне – 25-гадовы Міхаіл Бандарэнка, які балатуецца па Мазырскай акрузе №42. Ён сябра Партыі БНФ і ўдзельнік кампаніі «Еўрапейская Беларусь».
А ў Гомлі ідзе на выбары 28-гадовы Ягор Грышановіч, працаўнік «Альфа-банку» і сябра АГП.
Самы стары кандыдат – 68-гадовы Мікалай Лукша, сябра Рэспубліканскай партыі працы і справядлівасці. Ён ідзе на выбары па Рэчыцкай акрузе №44.
Сярод 75 зарэгістраваных у Гомельскай вобласці кандыдатаў ёсць толькі 21 жанчына – 28% ад агульнай колькасці.
У Гомельскай вобласці сябрамі палітычных партыяў з’яўляюцца70,7% кандыдатаў у дэпутаты. У лідарах тут ЛДП і Рэспубліканская партыя працы і справядлівасці – 15 і 13 кандыдатаў адпаведна.
Гарадзенская вобласць
На Гарадзеншчыне зарэгістраваныя 66 кандыдатаў у дэпутаты. З іх 51 мужчына і 15 жанчын (22,7%). Сярэдні ўзрост – 46,4.
Пяць кандыдатаў у дэпутаты маладзейшыя з 30 гадоў. Адзін – старэйшы з 70 гадоў.
Самы малады кандыдат – 26-гадовы Дзмітрый Арцюх, які вылучаецца па Замкавай акрузе №57. Ён дырэктар Карэліцкага раённага краязнаўчага музею і вылучаўся ад працоўнага калектыву.
Чатыры кандыдата нарадзіліся ў 1990 годзе – Павел Коўшаль і Яраслаў Асташоў з ЛДП, Арсеній Папялушка з КПБ, спартовы інструктар Алег Дубіцкі.
Самы стары кандыдат – 75-гадовы Іван Крук, вядомы актывіст АГП. Ён вылучаецца па Смаргонскай акрузе № 59.
На Гарадзеншчыне менш за ўсё кандыдатаў прадстаўляюць палітычныя партыі – толькі 56,1%. Сярод лідараў тут ЛДП і КПБ – у іх 12 і 7 кандыдатаў адпаведна.
Менская вобласць
На Меншчыне зарэгістраваныя 73 кандыдата ў дэпутаты. З іх 54 мужчыны і 19 жанчын (26%). Сярэдні ўзрост – 44 гады, гэта другі паказнік па Беларусі.
Пяць кандыдатаў на Меншчыне маладзейшыя з 30 гадоў. Самыя маладыя – 23-гадовыя Павел Рудакоўскі і Яраслаў Сегень. Сегень – сябра ЛДП, ён працуе галоўным спецыялістам аддзелу землеўпарадкавання Крупскага райвыканкаму, вылучаецца па Вілейскай акрузе №74.
Павел Рудакоўскі вылучаецца па Барысаўскай акрузе № 62, ён беспартыйны, працуе технікам-тэхнолагам у ТАА «СисЭйТи».
Самы стары – 68-гадовы дзейны дэпутат Палаты прадстаўнікоў, экс-кандыдат у прэзідэнты Мікалай Улаховіч. Ён лідар Беларускай патрыятычнай партыі і грамадскага аб’яднанне «Беларуска казацтва».
На Меншчыне сябрамі палітычных партыяў зʼяўляюцца 58,9% кандыдатаў. У лідарах тут зноў ЛДП (16 кандыдатаў) і КПБ (7).
Магілёўская вобласць
На Магілёўшчыне зарэгістравана 66 кандыдатаў у дэпутаты. З іх 46 мужчынаў і 20 жанчынаў (30,3%). Сярэдні ўзрост – 45,4 гадоў.
Чатыры кандыдата на Магілёўшчыне маладзейшыя за 30 гадоў, адзін – старэйшы за 70 гадоў.
Самы малады кандыдат у рэгіёне – 24-гадовая медычная сястра з Бабруйску Юлія Чарняк. Яна вылучалася ад Беларуская сацыял-дэмакратычнай партыі (Грамада).
У тройку самых маладых таксама ўваходзіць сябра Партыі БНФ Арсеній Чыгір і Марыя Мацюха з ЛДП.
Самы стары кандыдат – 73-гадовы Мікалай Залозны, сябра БСДП (Г).Ён вылучаецца па Магілёўска-Кастрычніцкай акрузе №86.
У Магілёўскай вобласці сябрамі палітычных партыяў зʼяўляюцца 60,6% кандыдатаў у дэпутаты. Сярод лідараў тут нечакана апынулася апазіцыйная АГП – у іх 10 кандыдатаў. На другім месцы ЛДП з 9 кандыдатамі.
Выбары ў Палату прадстаўнікоў адбудуцца 17 лістапада.
ІІ belsat.eu
