Грамадзянам Беларусі з 4 лютага не будзе патрэбная віза ў Іран для турыстычных паездак, паведамляе дзяржаўнае інфармацыйнае агенцтва ісламскай рэспублікі IRNA. Бязвізавых для беларусаў дзяржаваў стане 44.
Як адзначае іранскае медыя, Тэгеран «у аднабаковым парадку» пастанавіў скасаваць візы для грамадзянаў 28 дзяржаваў. Акрамя Беларусі, у пераліку, напрыклад, Узбекістан, Кыргызстан, Харватыя, Японія, Сербія, Боснія і Герцагавіна, шэраг краінаў Афрыкі і Блізкага Усходу.
Дасюль турыстычная віза каштавала для беларусаў 15 еўраў.
Ісламскую рэспубліку нельга лічыць папулярным турыстычным кірункам для грамадзянаў нашай краіны. У 2022 годзе, паводле Белстату, амаль 40 % усіх замежных паездак беларусаў прыпала на Турцыю, далей у гэтым рэйтынгу – Егіпет, Аб’яднаныя Арабскія Эміраты, Грузія, Польшча, Італія і Грэцыя.
У больш падрабязнай статыстыцы адносна выязнога турызму за 2021 год Белстат апублікаваў топ-15 найпапулярнейшых кірункаў, на першым месцы быў Егіпет (амаль 218 тысячаў беларускіх турыстаў), на апошнім – Грэцыя (908).
Іранцы могуць наведваць нашую краіну без беларускіх візаў, але з пэўнымі ўмовамі:
- прыбыццё ў Беларусь праз аэрапорт;
- зваротны квіток на самалёт;
- дзейная шматразовая віза дзяржаваў ЕЗ або шэнгенскай зоны з пазнакаю аб уездзе на іх тэрыторыю.
Сцяпан Кубік belsat.eu
