Ізраіль і «Хамас» у апошнюю хвіліну дасягнулі пагаднення аб падаўжэнні шасцідзённага спынення агню яшчэ на адзін дзень, паведамляе Армія абароны Ізраілю.
Гэта зроблена, каб перамоўцы маглі працягнуць працу над угодай аб абмене закладнікаў, якія ўтрымліваюцца ў Газе, на палестынскіх зняволеных.
«Улічваючы намаганні пасярэднікаў для працягу працэсу вызвалення выкрадзеных і ў адпаведнасці з умовамі пагаднення, замірэнне будзе працягвацца», – гаворыцца ў заяве ізраільскіх вайскоўцаў.
Перамірʼе дазволіла даставіць у Газу гуманітарную дапамогу пасля таго, як большая частка прыбярэжнай тэрыторыі з насельніцтвам 2,3 млн чалавек была пераўтвораная ў пустку ў выніку ізраільскіх бамбаванняў у адказ на напад баевікоў «Хамасу» 7 кастрычніка.
«Хамас», які вызваліў у сераду 16 закладнікаў у абмен на 30 палестынскіх зняволеных, у сваёй заяве таксама паведаміў, што замірэнне будзе працягвацца сёмы дзень.
Дзяржсакратар ЗША Энтані Блінкен прыбыў у Тэль-Авіў. Гэта ягоная трэцяя паездка ў рэгіён пасля 7 кастрычніка, каб абмеркаваць падаўжэнне паўзы ў баявых дзеяннях, гуманітарную дапамогу і абмен закладнікаў.
Умовы Ізраілю цягам замірэння на дзень – вяртанне з палону 10 закладнікаў. «Хамас» некалькі дзён таму ледзь не адмовіўся ад угоды, бо ў Газу трапіла не ўся гуманітарная дапамога, якую абяцала ААН.
Арсен Рудэнка belsat.eu
