Анатоля Кудласевіча затрымалі ўдома 29 верасня, а кватэру разграмілі падчас ператрусу. 30 верасня справу пісьменніка разгледзела суддзя Фрунзенскага раёну Ала Скуратовіч.
На Кудласевіча склалі пратакол паводле артыкулу 24.23 КаАП (несанкцыянаванае пікетаванне), паведамляе праваабарончы цэнтр «Вясна». Барда абвінавацілі ў тым, што ён размясціў БЧБ-сцяг на балконе сваёй кватэры.
Кудласевіч распавёў, што супрацоўнікі міліцыі прыйшлі да яго раніцай 29 верасня, а сцяг у кватэры вісеў яшчэ з 2020 года. Суддзя Скуратовіч зрабіла некалькі заўваг Анатолю, каб ён «гаварыў па сутнасці», бо тое, што «народ падманулі» не мае дачынення да справы. Вынікам суду стаў штраф у памеры 2900 рублёў (100 базавых велічыняў).
Анатоль Кудласевіч мае інваліднасць другой групы: у яго выдаленае адно лёгкае. Таксама ў мужчыны праблемы з ціскам. Нягледзячы на гэта, пісьменніка ноч да суда ўтрымлівалі на Акрэсціна.
ГГ, belsat.eu