Аляксандр Лукашэнка 28 чэрвеня сваім указам зацвердзіў Канцэпцыю прававой палітыкі Беларусі. 30 чэрвеня дакумент быў апублікаваны на Нацыянальным прававым партале.
Канцэпцыя прававой палітыкі прынятая з мэтай «далейшага развіцця прававой сістэмы з улікам абноўленай Канстытуцыі» і «сучасных выклікаў і задач, якія стаяць перад дзяржавай і грамадствам».
Асноўнай задачай дзяржавы ў канцэпцыі названае «забеспячэнне правоў і свабодаў чалавека і грамадзяніна, гарантый іх рэалізацыі». Але пры гэтым адзначаны даволі шырокі і размыты спектр падставаў, на якіх могуць абмежаваць правы і свабоды: «у інтарэсах нацыянальнай бяспекі, грамадскага парадку, абароны маральнасці, здароўя насельніцтва, правоў і свабодаў іншых асобаў».
Канцэпцыя падкрэслівае, што сяброўства Беларусі ў міжнародных арганізацыях і інтэграцыйных аб’яднаннях ажыццяўляецца «пры абавязковым захаванні дзяржаўнага суверэнітэту». А тэрыторыя краіны ёсць «адзінай і неадчужальнай».
Якуб Хруст belsat.eu