У краіне працягваецца пераслед грамадзянаў з актыўнай пазіцыяй. Часам праявы рэпрэсій проста не ўкладаюцца ў галаве. «Белсат» падводзіць вынікі дня паводле дадзеных праваабарончага цэнтру «Вясна».
Жыхарку Гомля Алу Караленку затрымалі за правядзенне ў парку дзіцячага свята. Міліцыя ўмяшалася ў свята нібыта таму, што баялася «правакацый і палітычных лозунгаў», а на масавае мерапрыемства яго ўдзельнікі не падалі заяўку ў гарвыканкам. Яе пакаралі арыштам на 7 дзён.
За абразлівы каментар пра супрацоўніка міліцыі грамадскай бяспекі Кастрычніцкага РАУС Магілёва Аўдзеева суд пакараў Алега Лябіхава двума гадамі «хіміі» і выплатай 1000 рублёў маральнай шкоды пацярпеламу.
У Горадні затрымалі Алега Сягодніка. Ён – мантажнік, бацька траіх дзяцей, раварыст, сябра ўжо ліквідаванай арганізацыі «ВелаГродна». У 2020 годзе адбываў арышт і быў аштрафаваны па арт 23.34 КаАП.
65-гадовую актывістку Алену Гнаўк адміністрацыя баранавіцкага СІЗА пакарала «суткамі» ў карцары. Там яе будуць утрымліваць да 1 ліпеня.
Суддзя Марына Фёдарава прызнала палітвязняў Дзмітрыя Суганяева і Паліну Мартынчык вінаватымі ў «Арганізацыі і падрыхтоўка дзеянняў, што груба парушаюць грамадскі парадак« (арт. 342 КК) і пакарала хлопца трыма гадамі «хіміі», а дзяўчыну – трыма гадамі «хатняй хіміі».
Палітвязня Паўла Аўчарава ў шклоўскай калоніі будуць судзіць за «злоснае непадпарадкаванне патрабаванням адміністрацыі калоніі».
Асуджаны да двух гадоў калоніі Арцёма Анішчука па адбыцці тэрміна не выпусцілі на волю – яго ўзялі пад варту па новай справе.
За выраз «Без Лукашэнкі!» у адрас пікета БРСМ жыхара Жабінкі Вячаслава Бычынскага асудзілі да 1,5 гадоў «хіміі».
Палітзняволенай настаўніцы музычнай школы Аксане Каспяровіч прысудзілі год і два месяцы калоніі за «Распальванне варожасці ці варажнечы».
Хворую на анкалогію пенсіянерку Галіну Дзербыш раздзявалі сілай перад судом.
Да 15 гадоў калоніі па «тэрарыстычным артыкуле» асудзілі грамадзяніна РФ Андрэя Паднябеннага.
На 30 чэрвеня праваабаронцамі прызнаныя палітвязнямі 1236 чалавек, якія зараз знаходзяцца ў зняволенні.
Марыя Мурашка belsat.eu