Літоўская дзяржаўная інспекцыя па бяспецы атамнай энергетыкі (ДІБАЭ) паведамляе, што 25 траўня накіравала ліст у МНС Беларусі з заклікам спыніць эксплуатацыю і пуск 1-га і 2-га энергаблокаў Беларускай АЭС, паведамляе Delfi са спасылкай на рэгулюючы орган.
Электрастанцыю просяць не эксплуатаваць да таго часу, пакуль не будуць вырашаны ўсе пытанні ядравай бяспекі.
Таксама ДІБАЭ просіць беларускі бок патлумачыць апублікаваную інфармацыю аб тым, што контур ахаладжэння рэактара 2-га энергаблока станцыі быў забруджаны арганічнымі рэчывамі, а другаснага цыркуляцыйнага контуру 1-га энергаблока – радыенуклідамі. Інспекцыя таксама запытвае растлумачэнні па недахопах мацавання корпуса рэактара, а таксама па выяўленых дэфектах і незавершаных работах.
«Мэта – атрымаць ад Беларусі інфармацыю аб усталяваных лімітавых значэннях актыўнасці радыёнуклідаў, якія выкідваюцца ў навакольнае асяроддзе. ДІБАЭ таксама заклікае МНС і іншыя адказныя ўстановы Беларусі апублікаваць рэкамендацыі, прад’яўленыя падчас міжнародных экспертных місій, і вынікі іх выканання, прадставіць дадатковую інфармацыю, якая неабходна для больш дакладнага прагназавання магчымых аварыйных выкідаў», – гаворыцца ў паведамленні.
Копіі ліста былі адпраўленыя ў МАГАТЭ, Еўрапейскую камісію, Еўрапейскую групу па наглядзе ў сферы ядравай бяспекі (ENSREG) і Асацыяцыю заходнееўрапейскіх органаў рэгулявання ядравай бяспекі (WENRA).
Алена Рувіна belsat.eu