Прэзідэнт Украіны Уладзімір Зяленскі ў пятніцу, 30 верасня, склікае тэрміновае паседжанне Рады нацыянальнай бяспекі і абароны Украіны, паведаміў прэс-сакратар прэзідэнта Сяргей Нікіфараў.
«Прэзідэнт Уладзімір Зяленскі склікае на заўтра тэрміновае паседжанне Рады нацыянальнай бяспекі і абароны Украіны. Парадак дня і іншыя падрабязнасці паведамім пазней», – заявіў Нікіфараў.
У гэты ж дзень у Крамлі адбудзецца «цырымонія падпісання дамоваў аб уступленні ў склад Расеі новых тэрыторыяў». Нагадаем, 23–27 верасня на акупаваных тэрыторыях Украіны ў «ЛНР», «ДНР», Запарожскай і Херсонскай вобласцях прайшлі «рэферэндумы» за ўваходжанне ў склад Расеі.
Украіна і міжнародная супольнасць загадзя заявілі, што не прызнаюць вынікаў гэтага галасавання і яны не будуць мець ніякай юрыдычнай сілы з пункту гледжання міжнароднага права.
Вялікая Брытанія ўжо ўвяла санкцыі ў сувязі з «рэферэндумамі». Ужыць абмежаванні хочуць Канада і Еўразвяз. Грузія, Казахстан, Турцыя і Сербія таксама асудзілі правядзенне псеўдарэферэндумаў. У Беларусі пакуль з пазіцыяй не вызначыліся.
Алена Рувіна belsat.eu