28 верасня – 415 дзень пратэсту беларусаў супраць фальсіфікацыі выбараў, беззаконня і гвалту сілавікоў. «Белсат» падводзіць вынікі дня.
«Учора здарылася трагедыя. Яе прычына ў тым, што беларусаў без суду і следства кідаюць у турмы, катуюць, даюць крымінальныя артыкулы за пазіцыю. Закон больш не абараняе людзей, а людзі вымушаныя абараняць сябе самі.
Гвалтоўнае ўтрыманне ўлады сутыкнула людзей, якія ў прынцыпе ніколі б не аказаліся ворагамі. Яно ж прывяло да сітуацыі, калі ад нас хаваюць праўду пра тое, што адбылося, калі людзі не вераць «афіцыйным» паведамленням.
Я хачу выказаць спачуванні родным загінулых. Смерць любога чалавека – гэта вялізная страта. Беларусы не павінны паміраць праз нежаданне ўсяго толькі аднаго чалавека прыняць рэальнасць і сысці», – заявіла Святлана Ціханоўская.
Лукашэнка каментуючы гэтую трагедыю прыгразіў, што смерць супрацоўніка КДБ «беспакаранай не застанецца»
Былы кіраўнік Парку высокіх тэхналогіяў Валеры Цапкала пракаментаваў трагічныя падзеі ў Менску. Паводле Цапкалы, адказнасць за гвалт ляжыць на беларускіх уладах.
«Лукашэнка скраў выбары, скраў закон і прадставіў права на адвольнае забойства беларусаў наймітам у пагонах у разліку, што яго бандыты змогуць беспакарана зневажаць, катаваць, гвалціць і забіваць мірных грамадзян.
Андрэй даў адпор пярэваратнем у пагонах і нагадаў беларусам пра гонар і годнасць, пра доўг і абавязкі абараняць сябе, свой дом і сваю сямʼю. Андрэй паказаў, як трэба адказваць тым, хто сёння лічыць, што, калі ў іх зброя, значыць яны маюць рацыю.
Беларусы абавязкова дадуць адпор бандам, калі супрацоўнікі, якія яшчэ не заплямілі сябе крывёю, не вернуць у краіну закон і не арыштуюць галоўнага тэрарыста цэнтральнай Еўропы. Мірнаму, але справядліваму народу Беларусі проста не пакінулі іншага выбару», – гаворыцца ў звароце, апублікаваным на Ютуб.
У адказ на гэты зварот Следчы камітэт распачаў чарговую крымінальную справу супраць палітыка.
Былы супрацоўнік міліцыі, які мае больш як 20 гадоў працоўнага досведу ў праваахоўнай сістэме і 15 гадоў у аператыўных падраздзяленнях, кажа «Белсату»: здарэнне 28 верасня не выглядае як аперацыя супраць падазраванага ў асабліва небяспечных злачынствах.
У «Студыі» «Белсат» госць, прадстаўнік «ByPol» Алег Талерчык распавёў, што сілавікі парушылі заканадаўства, што забіты імі Андрэй Зельцар меў права на самаабарону.
Вядома, што Генеральная пракуратура за ноч, пасля страляніны вызначыла, што супрацоўнікі КДБ дзейнічалі ў межах прадстаўленых правоў і ў адпаведнасці з заканадаўствам.
«BYPOL» мяркуе, што ва ўчорашнім інцыдэнце па сілавым пранікненні супрацоўнікаў КДБ у жыллё менчука Андрэя Зельцара браў удзел і загінуў баец групы «А» КДБ Федасюк Дзмітрый Юрʼевіч, 1990 года нараджэння. Яго маці, як адзначае BYPOL, Федасюк Таццяна Мікалаеўна зʼяўляецца кіраўніком аднаго з падраздзяленняў цэнтральнага апарата КДБ.
«Дакладнасць інфармацыі аб паказаным інцыдэнце намі правяраецца. Нягледзячы на заяву Генпракуратуры, адзначым, што захаваныя на відэа дзеянні супрацоўнікаў КДБ па ўзломе дзвярэй кватэры не адпавядаюць патрабаванням дзеючага заканадаўства», – падкрэсліваецца ў паведамленні BYPOL.
Цяпер у Беларусі прызналі палітычнымі вязнямі 706 асобаў. Праваабаронцы заклікаюць улады Беларусі неадкладна вызваліць усіх палітычных зняволеных і спыніць палітычныя рэпрэсіі супраць грамадзянаў краіны.
29 верасня мінулага году колькасць палітзняволеных у нашай краіне складала 73 асобы, за год гэтая колькасць узрасла больш чым у дзесяць разоў.
Нарвежскія эксперты, якія раней дакладна прадказвалі прысуджэнне Нобэлеўскай прэміі, лічаць, што сёлета Святлана Ціханоўская з’яўляецца адной галоўным прэтэндэнтак на прэмію міру. Таксама і нарвежскія парламентарыі, апытаныя Reuters, называюць найбольш верагоднымі пераможцамі прэміі міру Грэту Тунберг і Святлану Ціханоўскую, а таксама зняволенага ў Расеі Аляксея Навальнага.
СК belsat.eu