Аптымістычныя заявы прагучалі 29 жніўня падчас пасяджэння Савету міністраў. Прэм’ер Раман Галоўчанка паабяцаў, што налета рэальныя прыбыткі беларусаў павялічацца на 3,5%, а ВУП вырасце на 3,8%, а гэта «вышэй за тэмпы развіцця сусветнай эканомікі», піша Telegram-канал ураду.
На сённяшнім пасяджэнні Савету міністраў абмяркоўвалі праекты прагнозу сацыяльна-эканамічнага развіцця, мэтавыя паказнікі грашова-крэдытнай палітыкі і рэспубліканскага бюджэту на 2024 год.
Кіраўнік ураду Раман Галоўчанка заявіў, што налета захаваюцца «мэтавыя задачы мабілізацыйнага падыходу развіцця эканомікі»:
«Тэмп росту ВУП мусіць скласці 103,8%. Гэта вышэй за тэмпы развіцця сусветнай эканомікі. Рэальныя прыбыткі насельніцтва павялічацца на 3,5% пры росце рэальных заробкаў амаль на 4%. Сярэдні заробак павінен скласці 2087 рублёў».
Прэм’ер паабяцаў, што выдаткі на адукацыю вырастуць на 1,5 млрд рублёў, на ахову здароўя – на 1,2 млрд. «На 12,6% будуць павялічаныя выдаткі на аплату працы ў бюджэтнай сферы. На выплату сацыяльнай дапамогі – на 14%, пенсіяў – на 16%», – паведаміў чыноўнік, не удакладніўшы, наколькі вырастуць выдаткі на сілавікоў.
Галоўчанка таксама выказаў упэўненасць, што налета беларускі экспарт павялічыцца да рэкордных паказнікаў, на 7,6%, або на $3,8 млрд болей, чымся сёлета:
«Страты рынкаў несяброўскіх краінах цалкам кампенсаваныя летась і сёлета, таму лічба налета – гэта чысты прырост. Аб’ём экспартнага прыбытку мусіць скласці болей за $53 млрд, што з’яўляецца максімальным паказнікам за ўвесь час».
Тым часам міністр фінансаў Юрый Селівёрстаў паведаміў журналістам, што бюджэт краіны налета пяты год запар плануецца дэфіцытным:
«Ацэнка дэфіцыту бюджэту на рэспубліканскім узроўні плануецца блізу 1,9% ВУП, крыху меней за 5 млрд рублёў. Крыніцы – рэшта, плюс тыя запазычванні, што мы робім і працуем з нашымі калегамі з Расейскай Федэрацыі ў інтэграцыйных праектах, залучаем гэтыя рэсурсы».
Агулам чыноўнік «не бачыць рызыкаў, якія б не дазволілі развязваць задачы, што стаяць».
У сёлетнім бюджэце прадугледжваўся дэфіцыт у 3,17 млрд рублёў, аднак міністр фінансаў пахваліўся прафіцытам.
«Прыбыткі рэспубліканскага бюджэту перавышаюць выдаткі на 2 млрд рублёў, так што пакуль мы ў плюсе», – сказаў Селівёрстаў.
У 2020 годзе ў бюджэт закладаўся дэфіцыт у 1 млрд рублёў, у 2021-м – 4 млрд, у 2022-м – 2,9 млрд рублёў.
Сяргей Крот belsat.eu