Прэм’ер-міністр Польшчы Матэўш Маравецкі 29 ліпеня заявіў пра перасоўванне расейскіх вагнэраўцаў у бок сувальскага калідору. Кіраўнік урада нагадаў, што амаль два гады Польшча сутыкаецца з «пастаянным наступленнем» на сваю мяжу, перадае TVP.info.
«Толькі сёлета было 16 тысяч спробаў незаконнага перасячэння [польска-беларускай мяжы – рэд. Belsat.eu]. Цяпер сітуацыя робіцца яшчэ больш небяспечнай: больш як 100 наймітаў групы Вагнэра рушылі ў бок Сувальскага пярэсмыка. Гэта, безумоўна, крок да далейшага гібрыднага нападу на польскую тэрыторыю», – заявіў Матэўш Маравецкі.
Ён таксама падкрэсліў, наколькі важна ў гэтым кантэксце ўмацоўваць польскую армію, а таксама польскую абаронную прамысловасць. Ён нагадаў, што ўрад падпісаў кантракты на абслугоўванне танкаў Т-64 і рамонт нямецкіх «Леапардаў» «на грошы замежных донараў».
Між тым за мінулыя содні мяжу Еўразвязу з Беларуссю спрабавалі парушыць 197 мігрантаў. У Польшчы зафіксавалі 162 такія спробы. Сярод іншаземцаў – грамадзяне Індыі, з іх дзевяць асобаў, убачыўшы польскія патрулі, вярнуліся на беларускую тэрыторыю. У раёне Дубічаў Царкоўных пасля спынення спробы парушэння мяжы мігранты закідалі камянямі польскія патрулі.
На латвійска-беларускай мяжы затрымалі 26 асобаў, на літоўска-беларускай – 9.
Якуб Хруст belsat.eu