Прэзідэнт ЗША Джо Байдэн у пятніцу, 28 студзеня, заявіў, што ЗША плануюць размесціць дадатковыя войскі ва Усходняй Еўропе ў рамках плану краінаў НАТО ўзмацніць сваю прысутнасць у гэтым рэгіёне, піша «Deutsche Welle».
Байдэн заявіў, што войскі ЗША будуць перакінутыя на ўсходні фланг Паўночнаатлантычнага альянсу «у бліжэйшай будучыні» і ўдакладніў, што іх будзе «няшмат».
Міністр абароны ЗША Ллойд Осцін заявіў раней у той жа дзень, 28 студзеня, што загаду аб адпраўцы войскаў пакуль не паступала. Паводле ягоных словаў, войскі знаходзяцца ў рэжыме «падрыхтоўкі да разгортвання» і будуць гатовыя дзейнічаць, калі НАТО аддасць загад. Яшчэ раней Осцін казаў пра 8500 вайскоўцаў, якія прыведзеныя ў баявую гатоўнасць з 24 студзеня.
Джо Байдэн падкрэсліў, што гэта мера перасцярогі, і ва Украіну амерыканскіх вайскоўцаў высылаць не будуць.
У Еўропе звычайна дыслакуюцца дзясяткі тысячаў амерыканскіх вайскоўцаў.
Прэзідэнт Украіны Уладзімір Зяленскі 28 студзеня заявіў, што дамагаецца ўдзелу ЗША ў працэсе перамоваў аб дээскалацыі сітуацыі каля ўкраінскай мяжы.
Агенцыя dpa са спасылкай на дадзеныя заходніх спецслужбаў паведаміла, што Расея павялічыла вайсковы кантынгент на мяжы з Украінай да 112-120 тысячаў чалавек. Акрамя гэтага прыкладна 35 тысячаў узброеных прарасейскіх сепаратыстаў знаходзяцца на Данбасе.
Крэмль сцвярджае, што вайскоўцы знаходзяцца ля межаў Украіны выключна з мэтай правядзення вучэнняў і адмаўляе намер напасці на Украіну, у той час як Захад падазрае, што такі сцэнар цалкам магчымы.
ГГ, belsat.eu