«Белсат» працягвае сачыць за падзеямі ў краіне.
Субота пачалася са студэнцкіх пратэстаў і затрыманняў.
Студэнты МДЛУ, БНТУ, БДУ выйшлі каля сваіх вузаў з мірнымі пікетамі: стаялі з плакатамі, спявалі песні. Але потым на вуліцы К. Маркса, каля адной з кавярняў, пачаліся брутальныя затрыманні.
Паводле ПЦ «Вясна» былі затрыманыя 15 студэнтаў. Паводле прадстаўніцы ГУУС Менгарвыканкаму Наталлі Ганусевіч, у суботу, 5 жніўня былі затрыманыя каля 30 чалавек. Такія дадзеныя яна перадала агенцыі «Інтэрфакс-Захад» а 16:33.
Некаторыя студэнты ўсё ж прайшлі шэсцем да Камароўкі.
А 15:00 каля Камароўскага рынку пачаўся жаночы пікет, які праз прыкладна 30-40 хвілінаў рушыў у бок пл. Перамогі.
Прыкладна а 16:40 былі затрыманыя журналісты «Белсату» Алена Дубовік і Максім Калітоўскі. Яны вялі наўпроставы эфір з жаночага маршу.
Вось відэа іхнага затрымання.
У суботу таксама стала вядома, што прадстаўніца прэзідыўма Каардынацыйнай рады Вольга Кавалькова на волі і ўжо ў Варшаве. Яна дала прэсавую канферэнцыю, дзе распавяла, як яна выязджала з Беларусі.
«Мяне вывезлі з Беларусі гэтак, як раней вывезлі Святлану Ціханоўскую», – кажа Кавалькова. Яна таксама абяцае хутка вярнуцца ў Беларусь, каб працягнуць палітычную дзейнасць.
«Калі знаходзілася за кратамі, прыйшлі супрацоўнікі ўладаў, сказалі, што калі не пагаджуся з’ехаць з краіны разам з імі, маё знаходжанне за кратамі будзе вельмі доўгім. Яны прыехалі да мяне ў ізалятар, апранулі каптурок і маску, паклалі на задняе крэсла. Я не ведала, у які бок мы едзем. Мы прыехалі ў пункт пропуску «Брузгі». Я прайшла пашпартны кантроль, яны перавезлі мае рэчы праз мяжу. Ехаў аўтобус да Варшавы і супрацоўнік памежнага камітэту папрасіў падвезці мяне».
Цалкам прэсавую канферэнцыю можна паглядзець вось тут.
У суботу падтрымалі таксама беларускія мірныя пратэсты і тыя беларусы, якія жывуць за мяжой. Яны выйшлі на цэнтральныя вуліцы гарадоў, а таксама да амбасадаў РБ. Пратэставалі за тое, каб адпусцілі ўсіх палітычных зняволенных, спынілі гвалт з боку сілавікоў і каб прайшлі сумленныя выбары прэзідэнта. Гэтак, на пікет да беларускай амбасады сёння выйшлі ў Вільне.
Каля рэзідэнцыі амбасадара Беларусі ў Літве прайшоў пікет супраць дзеянняў беларускіх уладаў. Людзі спрабуюць выклікаць дыпламатаў на размову ўжо чацвёрты тыдзень, а таксама яны хочуць выказаць салідарнасць з беларускім народам, які пратэстуе ў Беларусі.
«Вельмі абуральны быў адказ на калектыўную скаргу. Амбасадар сказаў, што выбары прайшлі якасна, задавальняючы працавала камісія, ніхто нікому нічога не перашкаджаў, тое, што людзі не змаглі прагаласаваць, самі вінаватыя», – паведаміў адзін з арганізатараў пікету, арганізатар экзіт-полаў у Літве Міхаіл Пракудзін.
Перфоманс адбыўся ў Бруселі.
Выйшлі на пратэст і ў Кіеве.
Нягледзячы на перакрыццё вуліц, жанчыны дайшлі ўсё-такі да плошчы Незалежнасці. Глядзіце, як гэта было.
Прыкладна а 20:10 з Кастрычніцкага РУУС выпусцілі журналістаў «Белсата» Алену Дубовік і Максіма Калітоўскага. На іх склалі пратаколы па арт. 22.9 (незаконны выраб СМІ), вынялі камеру і тэлефоны.
Поўны спіс затрыманых 5 верасня можна глядзець вось тут (спіс аднаўляецца).
Падзеі кожнага дня чытайце на нашым Тэлеграм-канале «Белсат».
ВЯ Belsat.eu