На судовым працэсе ў «справе БелаПАНу» пачаліся спрэчкі бакоў. Суддзя абвесціў перапынак да 3 кастрычніка, паведамляе Telegram-канал «Pozirkonline».
Разглядаць «справу БелаПАНу» пачалі 6 чэрвеня. Але 29 чэрвеня суддзя Менскага абласнога суда Вячаслаў Тулейка абвесціў перапынак у звязку з правядзеннем экспертызы да 12 верасня. Прычым не было вядома, якая экспертыза і ў дачыненні каго мусіла адбыцца. Суд праходзіць у закрытым рэжыме, удзельнікі працэсу далі падпіску аб неразгалошванні.
Вядома, што пачаліся спрэчкі бакоў. Наступнае паседжанне адбудзецца 3 кастрычніка.
Сярод абвінавачваных – медыяменеджар Андрэй Аляксандраў і ягоная нявеста Ірына Злобіна, экс-дырэктар кампаніі Дзмітрый Наважылаў і галоўная рэдактарка БелаПАНу Ірына Леўшына. Палітычных вязняў вінавацяць паводле шэрагу артыкулаў Крымінальнага кодэксу.
Падтрымаць палітзняволеных можна лістамі на адрас:
СІЗА № 1, вул. Валадарскага, д. 2, 220030, г. Менск (Ірыне Леўшынай, Андрэю Аляксандраву, Ірыне Злобінай, Дзмітрыю Наважылаву).
Алена Аляксандрава belsat.eu
