Пракурор запатрабаваў пасадзіць Эдуарда Бабарыку на 10 гадоў. Прысуд палітвязню агучаць 5 ліпеня. Новыя факты палітычнага пераследу – у хроніцы «Белсату».
На пасяджэнні Менскага абласнога суда пракурор Аляксандр Кароль патрабаваў для Эдуарда Бабарыкі 10 гадоў калоніі ва ўмовах узмоцненага рэжыму. Суддзя Уладзімір Арэшка агучыць прысуд 5 ліпеня. Бабарыку вінавацяць паводле чатырох крымінальных артыкулаў, у тым ліку ўхіленне ад выплаты падаткаў, арганізацыя масавых беспарадкаў і распальванне варожасці. Віны ён не прызнае.
У Менскім гарадскім судзе пачаўся разгляд справы відэааператара Паўла Падабеда. Палітвязня абвінавачваюць ва ўдзеле ў экстрэмісцкім фармаванні. Працэс вядзе суддзя Яўген Пісарэвіч. Падабеда затрымалі ў лютым летась пасля ператрусу ў яго ўдома.
У Горадні затрымалі спартовага дырэктара футбольнага клуба «Нёман» Дзмітрыя Кавалёнка. На відэа, запісаным сілавікамі, ён кажа, што быў падпісаны ў сацсетках на «экстрэмісцкія рэсурсы» і ўдзельнічаў у пратэстах. У праўладных каналах сцвярджаецца, што на Кавалёнка паскардзіліся самі футбалісты: ён нібыта навязваў «недарэчныя экстрэмісцкія ідэі».
Жыхару Пружанаў, які адбываў «хімію» прызначылі 2 гады калоніі за «знявагу вайскоўца». Такі вырак вынес суддзя суда Лідскага раёну Ігар Кашко на прапанову пракурора Мікіты Мысліўца. Паводле версіі абвінавачвання, Сяргей Кемеж апублікаваў у сацсетках «абразлівы каментар» пра камандзіра вайсковай часткі.
У Горадні супраць 23-гадовага хлопца завялі крымінальную справу за «здзек з дзяржаўнага сцяга». Маладзён арыштаваны. СК сцвярджае, што ён беспрацоўны, а ў момант здзяйснення «злачынства» быў п’яны. «Сарваў дзяржаўны сцяг і выкінуў яго», – гаворыцца ў паведамленні. На запісы камеры назірання бачна, што хлопец спачатку кінуў чырвона-зялёны сцяг на зямлю, потым забраў яго і ўнёс з сабою.
Тым часам праваабаронцы паведамляюць, што суды ў Беларусі штотыдзень разглядаюць крымінальныя справы за знявагу дзяржаўнай сімволікі. Звычайна фігурантаў пазбаўляюць волі. Апошнія такія выракі агучылі ў Менску і Барысаве.
Суддзя суда Савецкага раёну сталіцы Алена Жуковіч прызначыла Вадзіму Мякінніку арышт на 2 месяцы, аднак праз тое, што ў мужчыны мелася ранейшае неадбытае пакаранне, ён атрымаў два месяцы і адзін дзень у калоніі строгага рэжыму. Паводле версіі следства, Мякіннік сарваў чырвона-зялёны сцяг з будынку школы.
Суддзя суда Барысаўскага раёну Таццяна Шыман 23 чэрвеня разгледзела справу Міхаіла Анціпава, які, паводле версіі абвінавачвання, сарваў чатыры сцяга ў аграгарадку Лошніца, пашкодзіў палотнішчы і разламаў дрэўкі. Прысуд пакуль не вядомы. 20-гадовы Анціпаў – замежнік, мае ў Беларусі від на жыхарства, жыве ў нашай краіне 10 гадоў.
Віцебскі абласны суд адхіліў скаргу актывісткі Валянціны Болбат на арышт. 19 чэрвеня суддзя Наваполацкага суда Зінаіда Балаболава прызначыла жанчыне 30 содняў за распаўсюд «экстрэмісцкіх матэрыялаў» і «парушэнне парадку правядзення масавых мерапрыемстваў».
Судовая калегія ў крымінальных справах Вярхоўнага суда пакінула без задавальнення апеляцыйную скаргу Паўла Купрыенкі і Тараса Мачынскага. Абодва прызнаныя палітвязнямі. 9 сакавіка Гомельскі абласны суд асудзіў Мачынскага на 10 гадоў, а грамадзяніну Украіны Купрыенку – на 7 гадоў паводле абвінавачвання ў агентурнай дзейнасці і здрадзе дзяржаве.
Ад палітвязня Ігара Аліневіча ўжо месяц няма ніякіх вестак, паведамляе «Вясна». Актывіст анархічнага руху адбывае 20-гадовы тэрмін. Цяпер ён у жодзінскай турме, некалькі разоў яго змяшчалі ў ШІЗА.
Палітвязень Цімур Рызапур правёў у ШІЗА у калоніі ўжо больш за 100 содняў. Нядаўна яго змясцілі ў памяшканне камернага тыпу. Мужчына адбывае тэрмін у наваполацкай калоніі. Нібыта за ўдзел у масавых беспарадках яму прызначылі 4,5 года.
Акаўнт палка Каліноўскага ў Instagram прызналі «экстрэмісцкімі матэрыяламі». Гэта зрабілі на патрабаванне пракуратуры Заводскага раёну Менску.
На патрабаванне пракурора Віцебскай вобласці ў Беларусі заблакавалі доступ да шэрагу ўкраінскіх медыяў: glavred.info, spektr.press, hromadske.ua, news.online.ua», tribun.com.ua. Афіцыйнай прычынаю названая публікацыя гэтымі рэсурсамі «інфармацыі экстрэмісцкага характару, што прымушае грамадзянаў да супрацьдзеяння дзяржаўнай уладзе Рэспублікі Беларусь у звязку з сітуацыяй адносна ПВК Вагнэр». Акрамя таго, там знайшлі «недакладныя звесткі, што дыскрэдытуюць Лукашэнку».
Сяргей Крот belsat.eu