Беларускі палітык Анатоль Лябедзька паведаміў у Facebook пра затрыманне свайго сына Арцёма, які знаходзіўся ў Беларусі. Па ягоных словах, гэта адбылося 28 сакавіка.
«Сёння забралі майго сына. Толькі за тое, што ён Арцём Лябедзька, што ён мой сын. Самае мярзотнае, калі пачынаюць распраўляцца з роднымі, бяруць у закладнікі тваіх блізкіх», – распавёў Анатоль Лябедзька.
Па словах Анатоля, ягоны сын не з’язджаў з Беларусі таму што хацеў жыць там і быў перакананы, што яму няма чаго прад’явіць акрамя таго што ён сын свайго бацькі.
«Спрабую загасіць у сабе нянавісць і злосць, але нешта не атрымоўваецца. Дай нам божа сілы і моцы», – напісаў палітык.
Праз што быў затрыманы Арцём Лябедзька – невядома.
Сам Анатоль Лябедзька цяпер знаходзіцца па-за межамі Беларусі. Ён з’яўляецца прадстаўніком Святланы Ціханоўскай па парламенцкім супрацоўніцтве і пытаннях канстытуцыйнай рэформы. Раней ён быў кіраўніком Аб’яднанай грамадзянскай партыі. Вядома, што ў Беларусі супраць яго ўзбуджана крымінальная справа.
Алена Рувіна belsat.eu