Беларускую асацыяцыю журналістаў узнагародзілі ўкраінскай прэміяй за абарону свабоды слова
Кажуць, беларускія журналісты – прыклад украінскім у тым, як трэба змагацца за свае правы.
Сакратарыят Нацыянальнага саюзу журналістаў Украіны ўганараваў Беларускую асацыяцыю журналістаў прэміяй за абарону свабоды слова імя Ігара Лубчанкі, піша БАЖ.
Прэмія – праява салідарнасці і падтрымкі з боку ўкраінскіх калегаў, патлумачыў старшыня НСЖУ Сяргей Таміленка.
«За апошні год незалежныя беларускія журналісты падвяргаліся і падвяргаюцца грубаму ціску ўлады, сотні калегаў сталі ахвярамі збіцця і рэпрэсій, дзясяткі адпраўленыя за краты, – расказаў ён на цырымоніі ў Кіеве. – Беларуская асацыяцыя журналістаў салідарная з рэпрэсаванымі калегамі, таму рэжым Лукашэнкі пераследуе кіраўніцтва БАЖ і пазбавіў арганізацыю рэгістрацыі. Калегі з Беларусі зʼяўляюцца прыкладам для ўсіх украінскіх журналістаў, як трэба змагацца за свае правы, як быць верным каштоўнасцям свабоды слова і нашай прафесіі».
На той жа цырымоніі прэмію імя Паўла Шарамета ўручылі крымскаму журналісту радыё «Свабода» Міколу Сямёну.
БАЖ «ліквідаваны» беларускімі ўладамі разам з яшчэ больш як 270 няўрадавымі арганізацыямі. Але асацыяцыя працягвае дзейнасць у выгнанні.
АА belsat.eu
