Прэзідэнт Расеі Уладзімір Пуцін прыняў запрашэнне ад прэзідэнта Інданезіі Джока Ўідода прыняць удзел у саміце краін «Групы дваццаці» які пройдзе на востраве Балі 15-16 лістапада. Аб гэтым паведаміў памочнік кіраўніка расейскай дзяржавы Юрый Ушакоў, перадае «Интерфакс».
У саміце таксама павінен прыняць удзел прэзідэнт Украіны Уладзімір Зяленскі.
На пытанне журналістаў, ці даў расейскі бок адказ на запрашэнне на ўдзел у саміце G20, Ушакоў адказаў: «Так, мы пацвердзілі, што наш удзел прадугледжваецца».
«Яны пакуль запрашаюць у вочным фармаце. Яшчэ часу шмат. Спадзяюся, што пандэмія дазволіць правесці гэтае мерапрыемства ў вочным фармаце», – сказаў Ушакоў.
Таксама Ушакоў падкрэсліў, што Інданезія, якая прымае саміт сёлета, усё роўна запрасіла Пуціна, нягледзячы на ціск Захаду адклікаць запрашэнне для Расеі.
Раней прэзідэнт ЗША Джо Байдэн асабіста прасіў прэзідэнта Інданезіі не дапусціць удзелу Пуціна ў саміце гэтага года, а таксама пераконваў, што Расею трэба ўвогуле выключыць з гэтага фармату.
У канцы красавіка ў тэлефоннай размове з прэзідэнтам Уладзімірам Зяленскім Джока Ўідода запрасіў яго прыняць удзел у саміце – на гэтым настойвалі прадстаўнікі ЗША. 27 траўня Зяленскі пацвердзіў, што прыме ўдзел у саміце і тады выказаў спадзяванне, што Пуціна там не будзе.
Алена Рувіна belsat.eu
