Бацькам Маргарыты Ляўчук сілавікі прапаноўвалі запісаць відэа, каб яна не займалася палітыкай
Оперная спявачка Маргарыта Ляўчук паведаміла ў Instagram, што ейным бацькам прапанавалі запісаць відэа з просьбай аб тым, каб яна перастала займацца палітыкай.
«Таму я працытую аднаго вядомага чалавека: я стамілася, я сыходжу. Займацца каханнем. А каханне – гэта і ёсць мая Беларусь», – заявіла ў адказ яна.
Ранкам 26 траўня сілавікі затрымалі бацькоў спявачкі Маргарыты Ляўчук у ейнай роднай вёсцы Страдзеч Берасцейскага раёну. Іх асудзілі за «непадпарадкаванне міліцыі» і аштрафавалі на суму, эквівалентную $ 4 тыс. Увечары іх адпусцілі.
Таксама сілавікі зладзілі ператрус у кватэры блогера Андрэя Павука. Былая жонка Андрэя Павука паведаміла, што іхную кватэру фактычна разграмілі.
Нагадаем, у лютым стала вядома, што Маргарыту Ляўчук абвесцілі ў вышук як абвінавачаную ў справе пра «здзек з дзяржаўных сімвалаў». Таксама ў вышук трапіў ейны партнёр з дуэту «Красная зелень» Андрэй Павук.
Макар Мыш belsat.eu
