З расейскімі вайскоўцамі, якія 24 лютага захапілі Чарнобыльскую АЭС і з тых часоў утрымліваюць яе пад сваім кантролем, атрымалася дамовіцца пра перыядычную ратацыю працаўнікоў станцыі, паведамляе УНІАН са спасылкай на мэра Славуціча Юрыя Фамічова.
Часткова былі замененыя працаўнікі, якія працавалі на АЭС на момант захопу 24 лютага. З таго часу расейскія вайскоўцы не дазвалялі ім здаваць змену.
«Пра ратацыю персаналу на ЧАЭС: у нас атрымалася часткова замяніць тую змену, што працавала на момант 24 лютага. Ёсць сувязь з тымі, хто там», – паведаміў Фамічоў.
Мэр таксама падкрэсліў, што ўлады гораду не будуць супрацоўнічаць з акупантамі, якія ўварваліся ў горад раніцай 26 сакавіка.
«Ніякай супрацы з акупантамі не вядзём, ніякай дапамогі ад іх нам не трэба», – сказаў Фамічоў.
26 сакавіка расейцы ўварваліся ў Славуціч, паставілі блокпасты, у горад заехала расейская ваенная тэхніка. Была захопленая лякарня, мэра Юрыя Фамічова выкралі. Пазней Кіеўская абласная ваенная адміністрацыя паведаміла, што Фамічова вызвалілі.
ГГ, belsat.eu