«Белсат» падводзіць вынікі чацвёртага дня поўнамаштабнай вайны, якую распачала Расея ва Украіне. Пра галоўныя падзеі нядзелі, 27 лютага, чытайце ў нашым аглядзе.
Ва Украіне
Сітуацыя ў Кіеве цяпер спакойная, пад кантролем украінскай арміі і тэраабароны. Уначы было некалькі сутычак з дыверсійнымі групамі. У Офісе Зяленскага паведамілі, што пад Гастомелем была знішчана калона чачэнскага спецназа.
- Паветраныя сілы Украіны паведамілі пра збіццё ракеты, якая была выпушчана ў бок Кіева з тэрыторыі Белрусі.
- Гарады Чарнігаў, Марыупаль і Харкаў працягваюць кантралявацца Украінай. На Чарнігаўшчыне мясцовыя жыхары самастойна спынілі калону расейскіх танкаў.
- У Вінніцы ноччу былі чутныя перастрэлкі ў розных раёнах гораду, туды закідваліся дыверсійныя групы расейскага войска.
- Горад Новая Кахоўка ў Херсонскай вобласці цалкам перайшоў пад кантроль расейскіх войскаў. Інфармацыю пацвердзіў мэр гораду Уладзімір Каваленка.
- Прэзідэнт Украіны Уладзімір Зяленскі звярнуўся да беларусаў, прапанаваўшы зрабіць правільны выбар і прачнуцца: «Кіеў атакавалі ў 4 раніцы. У кагосьці такое пачуццё гумару, як у 1941 годзе. А вы спалі, браты Беларусы, а мы прачнуліся. Але вы і цяпер спіце. Зрабіце правільны выбар. Я ўпэўнены, гэта галоўны выбар вашага вялікага народу».
- Дарадца офісу прэзідэнта Украіны Аляксей Арэстовіч звярнуўся да расейскіх і беларускіх вайскоўцаў і паабяцаў гарантыі для тых, хто пагадзіцца скласці зброю. Арэстовіч падкрэсліў, што ўкраінскі бок не лічыць тых, хто склаў зброю палоннымі.
Таксама ў нядзелю Уладзімір Зяленскі заявіў аб фармаванні інтэрнацыянальнага легіёна. Для запісу ў яго неабходна звярнуцца ў амбасаду Украіны.
У Расеі
- Выданне «Obozrevatel» паведаміла, што ў Белгарадзе каля 5000 кантрактнікаў зладзілі бунт і адмовіліся ехаць ваяваць з Украінай. Фармальна сваю адмову ад удзелу ў ваенных дзеяннях ва Украіне кантрактнікі матывавалі тым, што гэта не прадугледжана іх кантрактамі.
- У Расеі ўпершыню прызналі страты ў вайне з Украінай. Пра смерць афіцэра Нурмагомеда Гаджымагамедава стала вядома пасля таго, як кіраўнік Дагестана Сяргей Мелікаў выказаў спачуванні сям’і жаўнера.
- Пуцін загадаў міністру абароны і начальніку генеральнага штабу перавесці сілы стрымання расейскага войска ў адмысловы рэжым нясення баявога дзяжурства.
- У Расеі на антываенных мітынгах затрымалі каля 1500 чалавек.
У Беларусі
Лукашэнка прызнаў, што з тэрыторыі Беларусі былі выпушчаны ракеты ў бок Украіны. Паводле яго, такія дзеянні былі «вымушаным крокам», які абараніў расейскія пазіцыі ў нашай краіне ад украінскіх ракетных дывізіёнаў.
- Тэлеграм-канал «Мотолько помоги» паведаміў, што ў Менску прызямліўся ўрадавы самалёта РФ. У гэты ж час прэс-сакратар прэзідэнта Расеі Дзмітрый Пяскоў заявіў, што ў Беларусі прыбыла дэлегацыя для перамоваў з Украінай. Паводле яго, у склад дэлегацыі ўвайшлі прадстаўнікі МЗС, Мінабароны і іншых установаў, а таксама адміністрацыя прэзідэнта.
- Офіс Зяленскага пацвердзіў, што ўкраінская дэлегацыя ўсё ж сустрэнецца з расейскай на беларуска-ўкраінскай мяжы ў раёне ракі Прыпяць. Паведамляецца, што Лукашэнка ўзяў на сябе адказнасць за тое, што падчас перамоваў і вяртанні ўкраінскай дэлегацыі ўсе самалёты, верталёты і ракеты, размешчаныя на беларускай тэрыторыі, застануцца на зямлі.
- Украінскія кібервойскі павалілі сайт Нацыянальнага банку Беларусі. Пра гэта паведаміў міністр лічбавай трансфармацыі Украіны Міхаіл Фёдараў. Акрамя Нацбанку ўдар закрануў і шэраг іншых стратэгічных сайтаў Беларусі.
- У гэты ж час беларускія кіберпартызаны здзейснілі чарговую атаку на беларускую чыгунку. У выніку БЧ пераведзеная на ручны рэжым працы, Менскі і Аршанскі вузлы паралізаваныя. Заяўленая мэта атакі – запаволіць перасоўванне расейскіх войскаў.
Беларусы выйшлі на вуліцы, каб паказаць што яны супраць вайны ва Украіне. Каля ўчасткаў для галасавання на так званам «рэферэндуме» яны скандавалі «Слава Украіне!» i «Не вайне!» У выніку за антываенныя акцыі затрымалі больш за 300 чалавек па ўсёй краіне.
У свеце
Еўрапейскія краіны дамовіліся адключыць расейскія банкі ад SWIFT. Пра гэта паведаміла кіраўніца Еўракамісіі Урсула фон дэр Ляен.Цяпер актывы ЦБ РФ, якія складаюць 643 мільярды долараў, замарожаныя.
Украіна афіцыйна накіравала іск супраць Расеі да Міжнароднага суду ААН у Гаазе. Кіеў намагаецца прыцягнуць Маскву да адказнасці за скажэнне паняцця генацыд, якое выкарысталі для апраўдання агрэсіі.
Dmarket, пляцоўка для гандлю NFT і In-game Metaverse items, ануляваў усе рахункі карыстальнікаў з Расеі і Беларусі. Сродкі былі адпраўленыя на падтрымку ўкраінскага войска, паведаміў міністр лічбавай трансфармацыі Міхаіл Фёдараў.
Міністэрства абароны Казахстану афіцыйна паведаміла, што краіна не накіруе свае войскі ва Украіну.
ВК, Belsat
