Амбасада ЗША ў Кіеве прапанавала амерыканскім грамадзянам падумаць пра выезд з Украіны

Амбасада ЗША ў Кіеве звярнулася да амерыканцаў ва Украіне з заклікам разгледзець варыянты выезду з краіны ў сувязі з магчымаю ваеннаю пагрозаю з боку Расеі.

«Сітуацыя з бяспекаю ва Украіне працягвае заставацца непрадказальнаю праз пагрозу ваенных дзеянняў Расеі і можа пагоршыцца без папярэджання, – гаворыцца ў паведамленні на сайце ўстановы. – Амбасада ЗША заклікае грамадзянаў ЗША ва Украіне разгледзець выезд цяпер праз камерцыйныя ці іншыя дасяжныя транспартавыя варыянты».

Амбасада таксама просіць грамадзянаў ЗША запоўніць адмысловую форму на сайце, каб мець магчымасці лепш камунікаваць, і падкрэслівае, што асабліва важна гэта тым амерыканцам, якія плануюць застацца ва Украіне. Акрамя таго, грамадзянам ЗША прапаноўваецца сачыць за навінамі, мець у парадку турыстычныя дакументы, у тым ліку вакцынавацца ад COVID-19, што аблегчыць выезд.

Дыпламатычная місія ЗША гатовая падтрымаць усіх амерыканскіх грамадзянаў, якія пастановяць выехаць, у тым ліку даць пазыку для рэпатрыяцыі, калі ёсць такая патрэба.

З лістапада 2021 года Расея канцэнтруе свае войскі на мяжы з Украінаю. Заходнія і ўкраінская выведкі лічаць, што Крэмль плануе маштабнае ўварванне, прычым дзеля гэтых мэтаў можа выкарыстоўвацца тэрыторыя Беларусі.

ГГ, belsat.eu