Пратэсты ў Дагестане трываюць ужо пяты дзень. Улады рэспублікі сцвярджаюць, што імі кіруюць«замежныя лялькаводы».
Сёння хваляванні ўспыхнулі не толькі ў сталіцы Дагестана Махачкале, але і ў Хасавюрце. Каб спыніць сутыкненні, сілавікі страляюць у паветра і ўжываюць слезацечны газ. Удзельнікаў масава затрымліваюць, пішуць райсейскія Telegram-каналы.
Кіраўнік рэспублікі Сяргей Мелікаў раней заявіў пра памылкі пры мабілізацыі, пагражаў чыноўнікам на месцах адказнасцю, а потым назваў відавочным тое, што «акцыі былі падрыхтаваныя і кіруюцца ў тым ліку з-за мяжы».
Дагестан – ледзь не адзіны рэгіён Расеі, дзе на мабілізацыю адказалі актыўным супрацівам. На дэманстрацыі выходзяць у тым ліку жанчыны.
Мабілізацыю абвясцілі ў краіне ў мінулую пятніцу. Паводле афіцыйных заяваў, у войска забяруць 300 тысяч чалавек.
Сяргей Крот belsat.eu