Віцебскага актывіста і распаўсюдніка незалежнай прэсы Барыса Хамайду затрымалі за медальён з гербам Пагоня на чырвонай стужцы, паведамляе БАЖ.
Барыс Хамайда 25 жніўня прыйшоў у суд, каб падтрымаць журналістку Таццяну Мацвееву, якую судзілі паводле абвінавачання ў несанкцыянаваным пікетаванні.
Каля паста дзяжурнага на ўваходзе Барыса Хамайду спыніў супрацоўнік Кастрычніцкага РАУС Уладзіслаў Шышкавец – той самы, што склаў адміністратыўны пратакол на журналістку. Ён запатрабаваў, каб Хамайда зняў медальён з гербам Пагоня. Той адмовіўся і спрабаваў патлумачыць міліцыянту, што носіць яго штодня і што выява Пагоні не з’яўляецца забароненай, і яна ёсць нават на гербе Віцебскай вобласці.
Аднак Уладзіслаў Шышкавец выклікаў службовую машыну, і актывіста павезлі ў пастарунак.
Сябры чакалі, што Барыса Хамайду адпусцяць з пастарунку, але ўвечары на волю актывіст так і не выйшаў. Мабільны тэлефон Барыса адключаны, а атрымаць нейкую інфармацыю пра яго праблематычна, бо ён не мае сям’і. Паведамляць жа нешта староннім людзям у міліцыі адмаўляюцца.
Імаверна, Барыса Хамайду будуць судзіць 26 жніўня, але што яму ставяць у віну, пакуль невядома.
Алена Рувіна belsat.eu
