Адвакат даведаўся з Telegram-каналаў, што крымінальную справу Марыі Калеснікавай перадалі ў Вярхоўны суд.
Сайт прыхільнікаў палітычнага зняволенага Віктара Бабарыкі пагутарыў з Уладзімірам Пыльчанкам – адвакатам Марыі Калеснікавай, зняволенай каардынатаркай штабу Бабарыкі. Пыльчанка сказаў, што не ведае, ці Калеснікава чула, што справу супраць яе і адваката Максіма Знака перадалі ў Вярхоўны суд, бо сам даведаўся пра тое з Telegram-каналаў пасля ўчорашняй сустрэчы са зняволенай.
Пыльчанка кажа: перадача справы ў суд значыць, што пракурор пагадзіўся з абвінавачаннем. Пры тым Калеснікава не згодная з абвінавачаннем, падавала хадайніцтвы аб спыненні крымінальнага пераследу, падставаў да якога не бачыць ні яна, ні ейныя абаронцы.
Адвакат верыць, што справу будуць разглядаць публічна, але калі прызначаць разгляд, не ведае. Калеснікавай і Знаку пагражае да 12 гадоў турмы за «змову з мэтай захопу дзяржаўнай улады» – так улады расцанілі дзейнасць Каардынацыйнай рады.
«Марыя ў парадку, шмат чытае, займаецца спортам, – расказаў Пыльчанка. – Ні разу не даводзілася бачыць яе угневанай або ў дрэнным настроі. Пастаянна ўсміхаецца і смяецца. Нягледзячы на часовыя нязручнасці, Марыя ні пра што не шкадуе і адчувае сябе свабодным чалавекам.
Да пытання аб тым, як яна ставіцца да крымінальнай справы, напэўна, лепш за ўсё падыдзе слова іранічна. Марыя ў курсе таго, што адбываецца, стала цікавіцца ходам працэсу як у дачыненні да Віктара Бабарыкі, так і іншых абвінавачаных. Упэўнена, што ўсё будзе добра і хутка ўсё змогуць убачыцца са сваімі роднымі і блізкімі. Перадае прывітанне ўсім беларусам».
АА belsat.eu
