Раніцай 26 траўня ў цэнтры Краснадара прагрымеў выбух. У Аператыўным штабе ФСБ у Краснадарскім краі пацвердзілі, што ў цэнтры гораду ў раёне вуліцы Марская адбыўся «хлапок», пацярпелых няма.
«У 04:17 у горадзе Краснадары быў чутны хлапок у раёне будынку на вуліцы Марской. На месца накіраваныя экстранныя службы. Па папярэдняй інфармацыі, пацярпелых няма. Зафіксавана пашкоджанне даху будынку і вокнаў, гарэння няма», – паведамілі ў Аператыўным штабе.
Мэр гораду Яўген Навумаў напісаў, што пашкоджанні атрымалі офісны будынак і жылы дом. «У пяціпавярховіку часткова выбітыя вокны, а ў прыватным доме, які стаіць побач, пашкоджаны дах», – напісаў ён.
Тэлеграм-канал «Baza» паведаміў, што Краснадар быў атакаваны двума беспілотнікамі. Як мінімум адзін быў збіты.
Жыхарка Краснадара расказала тэлеграм-каналу «Shot», што сярод ночы яна пачула гучны выбух каля жылога дома на вуліцы Гаражнай. Праз хвілін дзесяць – яшчэ адзін магутны прылёт. Паводле ейных словаў, побач з месцам падзення БПЛА былі знойдзены нейкія «касеты з шарыкамі і іголачкамі».
Ад Краснадара да бліжэйшага ўкраінскага пункта больш за 300 кіламетраў.
Алена Рувіна belsat.eu