Паліна Шарэнда-Панасюк падала афіцыйны зварот аб выхадзе з беларускага грамадзянства, бо яна больш не хоча мець нічога агульнага з акупацыйным рэжымам, што ўсталяваўся ў Беларусі. Пасля гэтага жанчыну этапавалі з калоніі № 24 для праходжання судова-псіхіятрычнай экспертызы. Цяпер месцазнаходжанне палітзняволенай невядомае.
«Паліна адмаўляецца ад беларускага грамадзянства і падала афіцыйны зварот на гэта. Паліна адмаўляецца ад беларускага пашпарта, са сталінскім гербам на вокладцы. Яна больш не хоча мець нічога агульнага з акупацыйным рэжымам, што ўсталяваўся ў Беларусі. Рэжымам, які знішчае незалежнасць Беларусі. Рэжымам, які ўдзельнічае ў акупацыйнай вайне. Рэжымам, які забівае яе і іншых палітвязняў у турмах. З моманту адмовы ад грамадзянства Паліна перастае лічыць сябе падуладнай усялякім законам акупацыйнай улады і адмаўляецца выконваць усе патрабаванні. Таксама Паліна цалкам адмаўляецца падпарадкоўвацца адміністрацыі калоніі, суду і іншым сілавым структурам.
Паліна падкрэслівае, што застаецца беларускай і патрыёткай сваёй Радзімы, Беларусі, і будзе да канца жыцця змагацца за яе свабоду. Паліна просіць міжнародныя гуманітарныя і праваабарончыя арганізацыі сачыць за яе лёсам і зрабіць усё магчымае для вызвалення яе і ўсіх палітзняволеных», – такую заяву ад імя сваёй жонкі даслаў «Белсату» муж Паліны Андрэй Шарэнда.
Таксама муж палітзняволенай заяўляе, што ягоную жонку ў калоніі павольна забіваюць. Некалькі дзён таму да маці Паліны чарговы раз вярнулася медычная бандэроль з неабходнымі для Паліны медычнымі прэпаратамі.
«Паліна ўжо больш за год не прымала патрэбных для функцыянавання печані медыкаментаў. На яе працягваецца каласальны фізічны ціск. Паліну фактычна ўвесь час трымаюць у штрафным ізалятары. Толькі за апошнія 5 месяцаў яна правяла ў жудасных умовах карцару 120 дзён, а агулам за няпоўны год у калоніі № 24 больш як 200 дзён. І гэта без уліку месяцаў, праведзеных у ПКТ (памяшканні камернага тыпу), дзе ўмовы нязначна лепшыя за штрафны ізалятар. Паліну марудна, але мэтанакіравана забіваюць. Арганізм Паліны настолькі знясілены, што ёй ужо цяжка хадзіць. Праз адсутнасць сонечнага святла зрок у Паліны моцна сапсаваўся», – кажа Андрэй Шарэнда.
Паліна Шарэнда-Панасюк утрымліваецца за кратамі з 3 студзеня 2021 года. У чэрвені 2021 года жанчыну асудзілі на два гады калоніі. Яе абвінавацілі ў гвалце ў дачыненні супрацоўніка органу ўнутраных справаў, у знявазе прадстаўніка ўлады і Лукашэнкі. У лютым 2022 года Паліну асудзілі яшчэ на год пазбаўлення волі паводле ч. 2 арт. 411 КК РБ («Злоснае непадпарадкаванне патрабаванням адміністрацыі папраўчай установы»).
Паліна Шарэнда-Панасюк мелася выйсці на волю сёлета ў жніўні. У кастрычніку 2022 года стала вядома, што на палітзняволеную завялі яшчэ адну справу паводле арт. 411 КК («Злоснае непадпарадкаванне патрабаванням адміністрацыі папраўчай установы»). Суд паводле справы пройдзе толькі зараз.
АС belsat.eu